Senati konfirmon John Ratcliffe, Drejtor i ardhshëm i Inteligjencës Kombëtare
Sot Senati konfirmoi me 49 vota për 44 kundër, republikanin John Ratcliffe si Drejtorin e ardhshëm të Inteligjencës Kombëtare, DNI, detyrë të cilën aktualisht e ushtron, Ambasadori i SHBA në Gjermani dhe I Dërguari i Presidentit Trump në dialogun Kosovë-Serbi, Richard Grenell.
Ky konfirmim vjen pasi bashkësia e inteligjencës e gjen veten përsëri në mes të një stuhie politike, mbi atë nëse bashkëpunëtorët e Trump ishin “të pa maskuar” në mënyrë të padrejtë në raportet e inteligjencës gjatë ditëve të fundit të administratës së Obamës.
Emërimi i Ratcliffe u votua në Komitetin e Inteligjencës së Senatit në fillim të kësaj jave me një raport vote partiake 8-7, duke reflektuar tensionet e vazhdueshme mbi këtë post.
“Roli i DNI është thelbësor për sigurinë tonë kombëtare, dhe unë mezi pres të punoj me Drejtorin Ratcliffe, pasi ai mbikëqyr përpjekjet e 17 agjencive të inteligjencës së vendit tonë,” tha sot kryetari i Komitetit të Inteligjencës së Senatit, Marco Rubio, duke shtuar:
“Në një kohë kur kërcënimet ndaj kombit tonë janë të shumta dhe të ndryshme, është thelbësore të kemi një DNI të konfirmuar nga Senati duke siguruar që një grup i gjerë i agjencive të inteligjencës janë duke shkëmbyer informacione nëpër linja, duke bashkërenduar aftësitë dhe duke punuar në përparimin e sigurisë së kombit “.
Gjatë seancës së tij të konfirmimit në fillim të këtij muaji, Ratcliffe u zotua para senatorëve se nëse konfirmohet në këtë post ai do të jepte informacione të inteligjencës pa paragjykim. Ratcliffe, i cili ishte një nga aleatët më besnik të Presidentit Trump gjatë “impeachment”, tha se kishte përvojë që të jetë një udhëheqës i pavarur i 17 agjencive të inteligjencës, duke pasur parasysh punën e tij të kaluar si një prokuror federal.
“Unë dua ta bëj shumë të qartë, nëse konfirmohem si DNI, çdo informtaor, nga e kaluara, e tashmja dhe e ardhmja, do të gëzojë mbrojtje sipas ligjit,” tha ai.
Presidenti emëroi Ratcliffe të shërbejë si DNI në muajin shkurt, vetëm disa muaj pasi kongresmeni tërhoqi papritmas emrin e tij për të njëjtin post kur u paraqit për herë të parë për të zëvendësuar Dan Coats.
Kur Ratcliffe tërhoqi emrin, Presidenti Trump në atë kohë citoi trajtimin e tij të ashpër në duart e “Lame Stream Media”.
Ndryshe, John Ratcliffe ishte një nga kritikët më të zëshëm të hetimit të Ish Hetuesit Special, Robert Mueller, për ndërhyrjen ruse në zgjedhjet e vitit 2016.
