Senati i SHBA, konfirmohet Ambasadori i ri në Kosovë

Jeffrey Hovenier është Ambasadori i ri i Shteteve të Bashkuara në Kosovë.

Emërimi i tij u konfirmua nga Senati amerikan.

Hovenier është diplomat karriere i shërbimit të jashtëm amerikan, i cili ka qenë pjesë e stafit të Të Dërguarit të Posaçëm të Kombeve të Bashkuara për statusin e Kosovës.

Muajin e kaluar, në një seancë dëgjimore para Komitetit të Senatit për Marrëdhënie me Jashtë, Hovenier tha se, nëse konfirmohet në postin e Ambasadorit, ai do ta ketë prioritet vazhdimin e mbështetjes amerikane për një Kosovë sovrane e demokratike.

Gjithashtu, tha ai, do ta inkurajojë Kosovën për konstruktivitet dhe fleksibilitet në bisedimet për normalizimin e marrëdhënieve me Serbinë.

Hovenier është nominuar për Ambasador në Kosovë në muajin korrik, nga Presidenti amerikan, Joe Biden. Për ta marrë detyrën ka qenë i nevojshëm konfirmimi i Senatit.

Hovenier zëvendëson Ambasadorin Philip Kosnett, mandati i të cilit përfundon në fund të vitit ndërkohë që ai është larguar nga Kosova pak muaj më parë dhe në detyrë vazhdon të jetë zëvendësi i tij, Nick Giacobbe.