“Serbët dhe shqiptarët janë kushërinj”, Berisha: Edi Ram quan gjenocidet serbe, gjenocide mes kushërinjve!
Pak orë para nisjes vendimtare të takimit vendimtar në Bruksel për fatin e Kosovës, në mes të Kryeministrit të Kosovës, Albin Kurti dhe Presidentit të Serbisë, Aleksandar Vuçiç, Kryetari i Partisë Demokratike, Sali Berisha, duke dënuar deklaratën antishqiptare të Kryeministrit Edi Rama se “serbët dhe shqiptarët janë kushërinj” tha se ai këtë e bënë për të justifikuar tradhtinë e tij ndaj kombit shqiptar, të shkelmojë mbi qindra mijëra të vrarë nga barbaritë serbë, dhe në fund, të quajë gjenocidet serbe si gjenocide të kryera mes kushërinjve.
“Sot, unë këtu dënoj me forcën më të madhe, deklaratën antishqiptare në Athinë të Edi Ramës.
Për herë të parë në tërë historinë e Shqipërisë, në tërë historinë e Ballkanit dhe botës, një njeri i papërgjegjshëm deklaron se shqiptarët dhe serbët janë kushërinj.
Për të justifikuar tradhtinë e tij ndaj kombit shqiptar, ai arrin të shkelmojë mbi qindra mijëra të vrarë nga barbaritë serbë, të quajë gjenocidet serbe si gjenocide të kryera mes kushërinjve.
Një mendje njerëzore më antishqiptare se kjo nuk mund të bëhet,” tha Sali Berisha duke shtuar se me kushërirllëkun që njeh Edi Rama, kërkon të legjitimojë çdo pretendim serb në territoret shqiptare.
“Kërkon të vendosë në harresë të gjitha barbaritë serbe, shkelmon historinë, shkelmon të vërtetën, shkelmon çdo gjë me një formulë të dhënë nga Beogradi, për ta thënë në Athinë.
Ku e bazon? E bazon vetëm në vasalitetin, në asgjë tjetër shqiptarët dhe serbët nuk janë kushërinj.
Shqiptarët janë këtu që kur është krijuar kjo tokë. Serbët, sipas historisë së tyre, kanë ardhur këtu nga stepat në shekullin e gjashtë.
Se ku e gjen lidhjen e gjakut Edi Rama, e gjen në tradhtinë e tij, në vasalitetin e tij ndaj Beogradit.
Ky është një akt i dënueshëm, sikundër dënoj implikimin e tij në fushatë elektorale në vende të tjera,” tha Kryetari i Partisë Demokratike, Sali Berisha, duke dënuar me ashpërsinë më të madhe deklaratën antishqiptare të Kryeministrit të Shqipërisë në Forumin Ekonomik në Athinë ndërsa garantoj shqiptarët se 14 maji është dita e vendimit pa kthim për largimin e Edi Ramës nga skena politike, qeveritarit i cili shkelmoi si tradhtar, interesat e tyre kombëtare.
