Serbët e Beogradit e bënë me lekë, Serbët e Tiranës i marrin lekët!

Një kronikë e transmetuar në një televizion të Tiranës, dhe ku raportohej se kompania ELKOS po ndërtonte një qendër tregtare aty ku ishte parashikuar të ndërtohej “Tirana Bus Terminal”, ishte një ogur i zi për pronarin e kësaj qendre të menduar tregtare, Ramiz Kelmendi nga Kosova, jo vetë pse përflitet se njëri prej aksionerëve është serbë.

Thashethemet as nuk u ngjizën, se si është e mundur që një serb ta luftoj një biznesmen kosovarë që gjithë pasurinë e ka fituar përmes tregtisë me serbë, kur njerëzit e Erion Veliajt mbinë në vendin e ngjarjes për ti hequr rrethimin dhe tabelën që informonte mbi ndërtimin e kësaj qendre tregtare, e që ishte pjesë e kronikës televizive në fjalë.

Atë që u quajt presion mediatik, dhe pak kush e pa edhe si kronikë, dha efekt nga Zyrat e trajtimit të kosovarëve pranë Bashkisë së Tiranës, dhe Ramiz Kelmendit i mbeti vetëm Facebooku që të bëjë statuse.

Në letrën e tij të gjatë, deputeti i LDK, rrëfen se si ishte takuar me Erion Veliajn dhe njerëzit e Bashkisë, si e kishte blerë pronën në fjalë pas konsultimeve në Bashki dhe si në fund u mashtrua sepse ai truall do të shpronësohet, siç e sqaroi sot kryebashkiaku Erion Veliaj, se prona do të shpronësohet sipas ligjeve në fuqi dhe terminali i autobusëve, një nevojë e domosdoshme për Tiranën, do të ndërtohet në shërbim të qytetarëve të saj.

“Kemi kërkuar nga Ministria e Transporteve që të përshijmë në terminal edhe Stacionin e Trenit, duke qenë se edhe treni do të rikthehet në Tiranë me një stacion kryesor, tek terminali i autobusëve tek Kthesa e Kamzës, dhe pastaj me një stacion qytetas. Pra jo mallrash, dhe jo parkim vagonash, por qytetas, aty ku është fillimi i Bulevardit të Ri. Për të gjithë ata privatë që një tokë shteti, siç ishte zona e Kthesës së Kamzës në librat e Bashkisë së Tiranës, e kanë tjetërsuar me lloj-lloj marifetesh për të ndërtuar qendra tregtare, dua t’iu them sot publikisht se nuk më intereson fare sa deputet i pushtetshëm apo milioner i madh mund të jesh, interesi publik është mbi interesin privat. Në zonën e Kthesës së Kamzës, pavarësisht çudirave, poshtërsive dhe falsifikimeve që janë bërë me tokat, do të jetë terminali i autobusëve të Tiranës, dhe stacioni i trenit i qytetit të Tiranës. Duke thënë këtë, dua t’i garantoj edhe deputetët, edhe milionerët, kush ka letra prone, sigurisht do të shpronësohet sipas ligjeve që ka Republika e Shqipërisë dhe vendimeve të Bashkisë së Tiranës, ama Tirana nuk ka më kohë për të humbur, Tirana nuk mund të shantazhohet, dhe Tirana do të respektojë çdo pronësi kundrejt pagesës, sepse Tirana nuk mund të rrijë pa terminal autobusësh e pa stacion treni, teksa hyn në 100-vjetorin e dytë të saj,” tha sot publikisht kryebashkiaku Erion Veliaj, gjatë ceremonisë së 99 vjetorit të shpalljes së Tiranës Kryeqytet i Shqipërisë.

Serbët e Tiranës

Ramiz Kelmendi mund të konsiderohet edhe sot një talent biznesi nga shumë njerëz të afërt që ka ndonëse në politikë ka dështuar frikshëm.

Por sot na del se edhe në marrëdhënie biznesi me “vëllezërit e tij serb”, biznesmeni Kelmendi nuk ka nuhatje ose është alergjik ndaj leximit të së kaluarës, dhe kjo i ra kokës.

Meqë historia e njerëzimit dhe marrëdhënieve shqiptaro-serbe nuk fillojë atëherë kur Ramiz Kelmendi filloi me biznesin, ky biznesmen kosovarë është dashur të konsultohet të paktën me ata që i njohin këto marrëdhënie.

Ramiz Kelmendi ankohet për një truall që tashmë edhe zyrtarisht i shkoj dëm, pasi u sqarua nga Bashkia dhe Erion Veliaj, por janë pikërisht këta njerëz në pushtet që e bën nul Konferencën e Bujanit për t’ia dhënë Kosovën shtetit të Serbisë, një sipërfaqe kjo shumë më e madhe se sa prona e Kelmendit.

Dhe jo vetëm kaq! Është e njohur edhe një çështje ligjore pas vitit 2000, kur biznesmeni Behgjet Pacolli fitoi tenderin për blerjen e Hotel “Dajtit” por atë, sërish Qeveria socialiste, ia dha ofertuesit të dytë, Hotelin në fjalë. Meqë në atë kohë nuk kishte filluar për fat të mirë Reforma në Drejtësi, instancat gjyqësore ekzistonin dhe Pacolli ishte i vendosur ta çoj çështjen deri në Strasburg, gjë që detyroj shtetin që të anulohet tenderi i shitjes së Hotel “Dajtit”

Por a është i pastër si loti edhe vetë Ramiz Kelmendi. Jo! Ai është akuzuar shumë por njerëzit që kanë punuar me të në Qeveri, PDK, me të cilët ai ndau kulaçin dhe kërbaçin sikur kur ishte në këtë parti ashtu edhe si Zv/kryeministër nga LDK, e cila ishte në koalicion me partinë akuzuese, Partia Demokratike e Kosovës, e kanë akuzuar rëndë dhe Kelmendi ligjërisht nuk e luftoi këtë pohim.  

Dy vjet më parë, Nënkryetari i Partisë Demokratike të Kosovës, Memli Krasniqi, tha se Zv/kryeministri Ramiz Kelmendi, krejt pasurinë e tij e ka bërë duke bërë biznes me Serbinë, ndërkohë që i ka bërë thirrje që të ndalë importet nga ky shtet në dëm të Kosovës.

“Ramiz Kelmendi është një parashutist politik, deklaratat e të cilit asnjëherë nuk meritojnë të merren seriozisht. Nuk mund të merret seriozisht njeriu që krejt pasurinë e tij e ka krijuar dukë bërë biznes me Serbinë, në dëm të ekonomisë së Kosovës,” tha Krasniqi duke shtuar:

“Ai në një anë flet për zhvillim ekonomik në Kosovë e në anën tjetër gjithë biznesin e vet e bën me Serbinë, duke krijuar vende pune atje, në vend se t’i krijojë ato këtu. Para se të flasë dokrra të porositura nga të tjerët, Kelmendi më mirë është të ndalojë importet milionëshe që kompania e tij i bën me Serbinë dhe të fillojë të mbështesë prodhimet e Kosovës, të cilat i ka dëmtuar dhe i dëmton edhe sot,” tha Krasniqi.  https://insajderi.com/ramiz-kelmendi-krejt-pasurine-e-ka-krijuar-duke-bere-biznes-serbine/

Dihet që Ramiz Kelmendi nuk i ndali importet me Serbinë, dmth vazhdoi me shtimin e pasurisë së tij duke bërë biznes me Serbët e Beogradit, dhe sot lufton me të gjitha mjetet taksën kundër produkteve serbe, por një gjë nuk e llogariti, Serbët e Tiranës. As për këtë nuk pyeti njeri ndonëse u pa që nuk lexon! Ai shpërfilli faktin se në Beograd serbët janë në pushtet në Tiranë që nga viti 1946, dhe nëse e beson faktin se këtu paska ardhur pluralizmi dhe serbët kanë ikur, atëherë humbja e 5 milionë eurove, siç thotë se ka humbur, është më e pakta që ka mundur ti ndodhë.

Sot, kur Ramiz Kelemendi ka armiq më shumë se kurrë, kur kryetari i Bashkisë së Tiranës e konfirmoi atë që kishte thënë fundshtatorin e vitit 2018 se aty do të ndërtohet “Tirana Bus Terminal”, biznesmeni Ramiz Kelmendi mund të vazhdoj të shkruaj në Facebook. Prona iku, Erion Veliaj vetëm mund të mëshirohet ta paguaj paksa më mirë por as ajo nuk varet nga ai. Këtë mund t’ja zgjidhë shoku i tij i vjetër Hashim Thaçi, që është mik i mikut të Aleksandar Vuçiçit, Edi Rama!  

Letra e plotë e Ramiz Kelmendit

Letër e hapur,

Kryetarit të Bashkisë së Tiranës z. Erion Velijaj

I nderuar kryebashkiak Velijaj, tre vite më parë në zyrën tuaj e ku ishin prezent edhe stafi juaj professional-teknik, kërkova mendim profesional rreth blerjes së prones për ndërtimin e ETC-së.

Në pyetjen time se a ka ndonjë kontest, interes publik për parcellën në fjalë, të gjitha përgjigjet nga ana juaj ishin në favor dhe mbështetje të ketij projekti.

Sa për ri-kujtim, isha deputet i Kuvendit të Republikës së Kosovës. Nuk prisja trajtim të veçantë, por të paktën mbajtje të fjalës dhe përkushtimin tuaj si ndaj një investitori dhe qytetari të Kosovës. Fatkeqësisht ndodhi e kundërta.

Çështja u prolongua në dhënien e lejes dhe u detyrova të vij tek ju sërish në takimin e radhës 15 muaj pas takimit të parë.

Gëzova sërish të njëjtën mbështetje verbale nga ju sikur edhe në takimin e parë. Në këtë periudhë të takimit tonë të dytë isha zv/Kryeministër i Republikës së Kosovës dhe sërish u trajtova si një qytetarë i thjeshtë. Nuk e kisha brengosje as kësaj radhe. Pas shumë pritjesh, pra 3 vite për të zbardhur lejen e ndërtimit (pritje e gjatë apo e shkurtër) le të vendosni ju dhe opinion), në nëntor të vitit 2018, zbardhët dokumentin për pagesën e taksës së ndërtimit dhe infrastrukturës që ishte në vlerë prej 1 milion e 680 mijë euro.

Kjo shumë u pagua nga ana jonë dhe ishim duke pritur zbardhjen formularit, që sipas ligjit duhej të zbardhej në afatin prej 5 ditësh. Kaluan ditët, afatet dhe pas tre muajve edhe pse hyri në fuqi me bazë ligjore, ne me instruksion të institucioneve ligjore filluam informimin me shkrim procedural tek të gjitha organet e nevojshme për fillimin e rrethimin dhe parapërgatitjet për vendosjen e gurëthemelit në të cilin do merrnit pjesë edhe ju si krybashkiak, për gëzimin që investimin po e bënë investitori nga Kosova. Në këtë pikë ndodhi ajo që parashihte prolongimi i lejes. Erdhën në punishte inspektorët tuaj pa asnjë vendim për të pezulluar punët dhe për të rrënuar rrethojat në orët e vona të së shtunës, duke dashur të friksojnë kompaninë ndërtuese.

Nuk e di dhe mbetem i befasuar përse ndodhi kjo ?

Njerëzit tuaj na plotësuan me përgjigje ndaj kësaj befasie. Tani kërkohet që ne t’ua falim bashkisë pronën në fjalë. Absurd. Me keqardhje po ju theksojë se detyrimi juaj që ne ti japim Bashkisë dhuratë me shantazhim, pronën në vlerë prej mbi 5 milion eurosh, tregon një çmenduri rinore. Bile na u tha se po që se nuk e japim pronën në këtë mënyrë, ne nuk do të ndërtojmë kurrë objektin e cekur.

Andaj z. Velijaj, publikisht po ju kërkoj të hiqni dorë nga këto aventura të cilat do dëmtojnë rëndë imazhin e të dyja palëve dhe do ndikojnë negativisht në politikat lokale për investitorët nga Kosova.

Ramiz Kelmendi – Deputet i Parlamentit të Republikës së Kosovës.

Deklarata sqaruese e Bashkisë së Tiranës:

Bashkia e Tiranës, mbështetur në politikat e saj dhe në strategjinë e zhvillimit të qëndrueshëm të transportit në qytetin e Tiranës, në bashkëpunim me Bankën Europiane për Rindërtim e Zhvillim (BERZH), ka identifikuar nevojshmërinë e krijimit të një terminali multimodal për transportin publik në Bashkinë e Tiranës.

Për këtë qëllim, Këshilli i Ministrave ka miratuar disa akte nënligjore, në funksion të vijimit të procedurave për realizimin e këtij projekti. Me vendimin nr. 770, datë 10.11.2011, Këshilli i Ministrave ka vendosur kalimin në pronësi të Bashkisë së Tiranës, të truallit me sipërfaqe 85.000 m2, me qëllim përdorimin e saj për ndërtimin e Terminalit Multimodal të Pasagjerëve.

Me anë të vendimit nr. 445, datë 22.05.2013, Këshilli i Ministrave ka përcaktuar Bashkinë e Tiranës, si autoritetin kontraktues për dhënien me koncesion vendor të projektimit të ndërtimit, financimit, operimit dhe transferimit të terminalit të transportit publik në qytetin e Tiranës.

Së fundmi, nga disa takime të përbashkëta ndërinstitucionale, jemi bërë me dije se Qeveria Qendrore, nëpërmjet shoqërisë Hekurudha Shqiptare sha, Ministrisë së Infrastrukturës dhe Energjisë dhe në bashkëpunim me Bankën Evropiane për Rindërtim dhe Zhvillim, po punojnë për zhvillimin e projektit të linjës hekurudhore Durrës-Tiranë -Rinas dhe ndërtimit të stacionit të Terminalit Hekurudhor. Ky terminal hekurudhor, synohet që të integrohet në terminalin multimodal për transportin publik në Bashkinë e Tiranës, projekt i cili po finalizohet nga ana e Bashkisë së Tiranës.

Në lidhje me ndërtimin e Terminalit Hekurudhor, tashmë shoqëria Hekurudha Shqiptare sha i është drejtuar zyrtarisht Bashkisë së Tiranës mbi bashkëpunimin për zhvillimin e këtyre dy projekteve madhore në fushën e transportit publik. Në dispozicion të këtyre dy projekteve, përveç pronës në pronësi të Bashkisë së Tiranës, duhet të vendosen dhe disa prona private, vendosja e të cilave do të realizohet nëpërmjet procedurave ligjore të shpronësimit publik. Për sa më sipër, ku interesi publik dhe ai i qytetarëve mbizotëron mbi çdo projekt tjetër, Bashkia e Tiranës dhe Ministria e Infrastrukturës dhe Energjisë do të bashkëpunojnë për të siguruar funksionalitetin optimal dhe zhvillimin e këtyre dy projekteve, në shërbim dhe funksion të qytetarëve të vendit tonë.