Serbët në Gazimestan për Vidovdan: “Nëse është e nevojshme do të luftojmë për Kosovë dhe Metohi”

Me thirrje shoviniste abtishqiptare, qytetarë të shumtë serbë nga Kosova e Serbia u mblodhën në Gazimestan të Obiliqit për ta shënuar Vidovdanin.

E gjithë ceremonia e lutjeve për Betejën e Kosovës, e cila ishte mbajtur para 629 vjetësh, u zhvillua nën masa të rrepta të sigurisë nga një numër i madh i pjesëtarëve të Policisë së Kosovës.

Disa mbanin flamurin e Serbisë në duar e disa të tjerë u mbështollën me të. Ndërkaq, të vegjlit serbë, kishin vënë edhe kapela me simbole nacionaliste serbe.

Edhe në këtë kremte të radhës pas lutjeve rituale, peshkopi ortodoks serb Atanasije Jevtiç, tha se do të luftojnë për Kosovën, për ta çliruar atë.

Duke theksuar se në Qeverinë e Serbisë ka politikanë që frikësohen, ai shtoi se nëse është nevoja, ata do të japin prapë jetën që të mbrojnë Kosovën.

“Qeveritarët tanë janë bërë miq me Erdoganin në Serbi. Ata po na i sjellin prapë turqit, ndërkaq Erdogani është bërë personalitet në Serbi. Por, ne kemi personalitetet, tona sepse nesër nëse duhet luftuar për Kosovën, gjysma prej nesh prapë do të luftonim. Në emër të zotit do të vijë edhe kjo ditë”, tha peshkopi Atanasije Jevtiç.

Serbët pretendojnë se përvjetori i kësaj beteje është fitore e tyre, sepse aty u vra sulltan Murati i Turqisë, por nga kjo betejë në përgjithësi Serbia kishte dalë e mundur nga ushtria turke.