Serbi, arrestohet drejtori Jetmir Ismailin, lejoi shfaqjen në Bujanoc të një filmi nga Kosova

Policia e Serbisë ka arrestuar sot në shtëpinë e tij në Nesalcë, Drejtorin e Shtëpisë së Kulturës në Bujanoc, Jetmir Ismailin. Autoritetet serbe e akuzojnë Ismailin se lejoi shfaqen e një filmi nga Kosova të financuar nga Qeveria e Kosovës dhe Këshilli Kombëtar Shqiptar në Luginë.

Ndaj këtij veprimi të shtetit serb ka reaguar kryetari i Këshillit Kombëtar Shqiptar në Luginë të Preshevës, Nevzad Lutfiu, duke theksuar se aktualisht, i arrestuari Jetmir Ismaili, është duke u mbajtur në stacionin policor në Bujanoc.

“Sipas familjarëve, ai është marrë në stacionin policor për tu intervistuar rreth shfaqjes së një filmi të metrazhit të shkurtër, i cili është mbështetur nga Qeveria e Kosovës nëpërmjet Këshillit Kombëtar Shqiptar e që drejtori i Shtëpisë së Kulturës në Bujanoc, i ka dhënë leje që të bëhet promovimi i tij nesër, po në Shtëpinë e Kulturës në Bujanoc”, deklaroi Lutfiu me një postim në llogarinë e tij në Facebook.

Ky presion, thotë ai, dhe këto metoda ndaj shqiptarëve po dëshmojnë se Serbia nuk e dëshiron paqen dhe të ardhmen në Ballkan.

“Skenarët me presione të tilla ndaj institucioneve dhe ndaj shqiptarëve janë të papranueshme dhe ftojmë të gjithë faktorët kombëtarë e ndërkombëtar që të dënojnë këtë veprim të policisë serbe sidomos ndaj rasteve të tilla e sidomos ndaj rastit të sotshëm”.

Për këtë arrestim, një reagim është bërë edhe nga Kosova. Blerim Vela, shef i kabinetit të presidentes Vjosa Osmani,  përmes rrjetit social Twitter, thekson se ky arrestim ka ndodhur nga represioni i egër prej regjimi të Vuçiçit.

“Policia e Serbisë arrestoi kreun e Shtëpisë së Kulturës në komunën e Bujanocit, Jetmir Ismaili, një shqiptar vendas për lejimin e shfaqjes teatrale të financuar nga institucionet e Kosovës!”, shprehet Vela duke përfunduar.

“Represioni i egër nga regjimi i Vuçiçit. Z. Ismaili do të lirohet menjëherë nga paraburgimi”.

Represioni i Serbisë ndaj shqiptarëve të Luginës së Preshevës bëhet në mënyrë të vazhdueshme dhe në mënyra të ndryshme.

Pasivizimi i adresave është edhe një prej këtyre mënyrave kurse kjo e arrestimit të drejtorit të Shtëpisë së Kulturës në Bujanoc, përse ka dhënë leje që të shfaqet një film, është një mënyrë tjetër.