Serbi, kryetari i komunës urdhëroi djegien e shtëpisë së një gazetari, dënohet…

Gjykata në Beograd ka dënuar ish-kryetarin e komunës Grocka , 4 vite e tre muaj burg pasi ka urdhëruar ti vihet flaka shtëpisë së një gazetari i cili po hetonte për korrupsionin

Dragolub Simonoviç, i cili është dënuar pas një gjykimi i cili zgjati plotë dy vjet, ishte kryetar i komunës Grocka, e cila është në kuadër të bashkisë Beograd, nga partia SNS e Presidentit të Serbisë, Aleksandar Vuçiç.

Me këtë dënim është dënuar edhe i akuzuari Aleksandar Marinkoviç, i cili ka kryer krimin dhe vazhdon të jetë në kërkim, ndërsa i akuzuari i dytë Vladimir Mihailoviç, si ndërmjetës u dënua me 4 vite burg.

Viktima, Milan Jovanoviç, gazetar i portalit Žig Info, pas vendimit të gjykatës ka falënderuar të gjithë ata që e ndihmuan në rindërtimin e shtëpisë.

“Unë tani jetoj dhe punoj nën mbrojtjen e policisë, pranë tyre ndjehem i sigurtë dhe nuk e di se sa do të zgjasë kjo, dëshiroj që askush të mos e ketë një mbrojtje të tillë, dëshiroj që të punoni dhe të shkruani të lirë,” tha ai para gazetarëve.

Ndryshe, hetimet kanë vërtetuar se Simonoviç i ka kërkuar pjesëtarit të policisë së ndërhyrjes së shpejtë, Vladimir Mihailoviç, që ti djegë shtëpinë gazetarit dhe si shpërblim i premtoi se do ti punësonte bashkëshorten. Polici më pas ka angazhuar Igor Novakoviçin, i cili Aleksandar Marinkoviçit dhe Bojan Cvetkoviç Shijackit i kishte dhënë adresën, raporton N1. Dhjetorin e vitit 2018,  Marinkoviç i ka hedhur dy koktej molotov në shtëpinë e Jovanoviçit, të cilin e ka shpëtuar bashkëshortja në momentin e fundit duke e nxjerr në mes të tymit dhe flakës.