Serbi, përmbyset treni me amoniak, mbi 50 persona të helmuar

Në qytetin Pirot, në juglindje të Serbisë, është shpallur gjendje e jashtëzakonshme pasi 51 persona u dërguan në spital me simptoma të helmimit, shkaku i rrjedhjes së amoniakut pas përmbysjes së një vagoni të një treni mallrash mbrëmjen e së dielës.

Kryetari i komunës së Pirotit, Vladan Vasiç, shpalli gjendje të jashtëzakonshme në këtë qytet, raporton TV N1, përderisa shkollat në atë qytet sot janë të mbyllura.

Sipas informacioneve nga Qendra Klinike Universitare në Nish, raporton RFE, janë shtruar 15 persona, 12 të rritur dhe tre fëmijë, për shkak të simptomave të helmimit.

Në njoftim theksohet se të gjithë pacientët janë në gjendje stabile dhe jashtë rrezikut për jetë dhe shtojnë se ata janë shtrirë në spital gjatë natës.

Ministria e Punëve të Brendshme ka njoftuar se “ka pasur rrëshqitje të vagonit në trenin e mallrave që përmbante amoniak dhe me atë rast ka pasur rrjedhje të gazit dhe koncentrim të madh të tij në atmosferë,” njofton MPB.

Ministria u bëri thirrje qytetarëve që jetojnë pranë vendit të ngjarjes “të mos largohen nga shtëpitë dhe të mos dalin jashtë”. Trafiku hekurudhor në atë zonë është ndërprerë.

Radio Televizioni Shtetëror i Serbisë, RTS, raporton se shtatë persona janë shtrirë në Qendrën Klinike Universitare në Nish nga 51 që kishin shtuar në spital shkaku i simptomave të helmimit me amoniak.

Punëtorët e turnit të dytë në fabrikën e gomave “Tigar Tires” në Pirot janë evakuuar, ndërsa turni i tretë, siç raporton RTS, nuk do të punojë.

Këtë aksident e bëri të ditur vetë kompania transportuese “Srbija Kargo”, e cila ka thënë se bëhet fjalë për trenin e mallrave që udhëton çdo ditë, duke transportuar lëndë të parë nga Bullgaria në Prahovë dhe Shabac.

“Srbija Kargo”, raporton RFE, në deklaratën e saj thekson se nuk ka viktima apo të lënduar, njofton RTS.