Serbia angazhon kompani për të lobuar për çështjen e Kosovës

Qeveria e Serbisë ka angazhuar kompaninë “Cleary Gottlieb Steen & Hamilton LLP” për të lobuar në Washington, raporton VOA.

Siç thuhet në një dokument zyrtar që është paraqitur në Sekretariatin amerikan për Drejtësi, më 29 mars, kompania e lartpërmendur do të lobojë për Serbinë “te të githa palët e interesuara në SHBA, në lidhje me çështje të caktuara të bashkëpunimit rajonal” që përfshijnë klientin – në këtë rast Serbinë – dhe Kosovën.

Ky dokument, siç raporton VOA, përfshin edhe kontratën midis kompanisë në fjalë dhe Zyrës së Prokurorit të Shtetit të Serbisë.

Në web-faqen zyrtare, “Cleary Gottlieb Steen” prezantohet si kompani e jurispodencës globale. Ajo ka zyra në disa vende të botës dhe është themeluar në vitin 1946.

Ndryshe, nga shpallja e pavarësisë së Kosovës në vitin 2008, RFE raporton se Serbia është angazhuar në një fushatë intensive lobimi kundër njohjes së saj dhe kundër pranimit të Kosovës në organizata dhe mekanizma të ndryshëm rajonalë dhe ndërkombëtarë.