Serbia firmos kontratën për ndërtimin e Autostradës Nish-Merdare

Serbia ka firmosur sot kontratën për ndërtimin e Autostradës Nish-Merdare me vlerë 100 milionë euro, autostradë kjo që lidhet me Autostradën “Ibrahim Rugova” në Kosovë.

Kontrata u firmos në Beograd nga ministrja e Ndërtimtarisë, Komunikacionit dhe Infrastrukturës e Serbisë, Zorana Mihajlloviç, dhe Drejtori i sektorit për Itali, Maltë, Slloveni, Kroaci dhe Ballkan Perëndimor të Bankës Investuese Europiane, Migel Morgado.

Zorana Mihajlloviç tha se kjo rrugë do t’i mundësojë Serbisë daljen në det, duke menduar për lidhjen që do të bëhet me Rrugën e Kombit ndërsa bëri të ditur se kjo është njëra nga gjashtë autostradat që do t’i ndërtojë Serbia gjatë vitit 2019 e 2020.

Komisionerja për Transport e BE, Violeta Bullc, tha se ndërtimi i autostradës Nish-Merdar është e rëndësishme për ndërlidhjen e rajonit, ndërsa ndërlidhja do të thotë paqe e shpresë.

Ndërtimi i autostradës Nish-Merdare sipas qeverisë së Serbisë, raporton B-92, nuk është i rëndësishëm vetëm për zhvillimin ekonomik dhe ndërlidhjen e qarqeve, por ka rëndësi edhe në aspektin politik, meqë kështu dëshmon interesin dhe dëshirën e Serbisë që marrëveshja të arrihet me kompromis.