Serbia hedh poshtë Propozimin e BE, Vuçiç: Nuk firmosi anëtarësimin e Kosovës në OKB!

Pasi u cilësua si tradhëtar kur dhe zyrtarët evropianë e bënë të ditur se Presidenti i Serbisë, Aleksandar Vuçiç e kishte pranuar Propozimin e BE i cili u bë edhe publik nga vetë Bashkimi Evropian, Vuçiç duke hedhur poshtë Propozimin hodhi poshtë dhe deklaratat e dy zyrtarëve të lartë, Borrell dhe Lajçak, se propozimi as nuk diskutohet dhe as nuk do të pësoj ndryshime, ndërsa iu drejtua kombit serb duke shtuar se ai i kishte kthyer përgjigje përfaqësuesve ndërkombëtar.

Dhe jo vetëm kaq! Nuk duam të bisedojmë për pranimin e ndërsjellë dhe anëtarësimin e Kosovës në OKB, tha Presidenti i Serbisë, duke e mveshur refuzimin me pranimin e shtetit të Kosovës ndonëse një detyrim i tillë nuk figuron në Propozimin e BE.

Gjithsesi, ai i jep përgjigje Brukselit që deri sa ai të jetë president, nuk do të firmos as në mënyrë formale dhe as informale pranimin e Kosovës, dhe as anëtarësimin në OKB.

“Serbia është e gatshme të punoj në zbatimin e shumë gjërave nga Plani, por kemi një vërejtje të madhe që e kemi thënë. Këtë ia kam thënë edhe Macronit dhe Scholzit në Munchen, dhe gjithë liderëve të mëdhenjë. Fjala është se nuk mund të flitet për pranimin e ndërsjellë dhe anëtarësimin e Kosovës në OKB.

Dhe, pse mendoni, pse nuk kam firmosur asgjë, për çka kanë folur se do firmos. Keni deklaratën, kam menduar se është njeri serioz, dhe u befasova në Parlament, kur shtetasi francez Milosh Jovanoviç publikoi në Instagram se jam tradhtar i cili do të firmos shkëputjen e Kosovës. Dy ditë më pas, ja asgjë nuk është firmosur në Bruksel,” tha Aleksandar Vuçiç ndryshe nga bashkëbiseduesit e tij evropainë dhe amerikanë të cilët për javë të tëra folën vetëm për një pengesë në dilaogun Kosovë-Serbi, Kryeministrin Albin Kurti, ndërsa sot zëdhënësi i BE, Peter Stano, edhe gënjeu opinionin duke deklaruar se Presidenti i Serbisë e kishte miratuar propozimin e Bashkimit Evropian.

Por, ato që i tha Presidenti i Serbisë, Aleksandar Vuçiç, mbrëmjen e sotme duke iu drejtuar kombit nuk ishin rastësi dhe nuk janë bërë pa lejen e liderëve të mëdhenjë të cilëve iu referua disa herë, ashtu si dhe besnikëria që shprehu ndaj kriminelit Vladimir Putin:

“Në tregun evropian të obligacioneve do të përfitonim shumë më shumë sikur ti vinim sanksione Rusisë, por nuk do ta harroj vitin 2015 kur e kam thirrë personalisht Putinin që të na ndihmoj në OKB!”

Në fund, bëri atë që dinë më miri, akuzoi Albin Kurtin duke theksuar se ai nuk do ta themeloj Asociacionin së shpejti.

“A do të formohet Asociacioni për një muaj, dy ose gjashtë, nuk dihet, por dikush duhet ta formoj, dhe pastaj na ngelet neve të flasim për çështjet tjera!”

Ndryshe, në asnjë Nen të Propozimit të BE palët nuk obligohen për njohje të ndërsjellë ndërkohë sa i përket anëtarësimit në OKB, po, në Nenin 4 të Propozimit thuhet qartë që “Serbia nuk do të kundërshtojë anëtarësimin e Kosovës në asnjë organizatë ndërkombëtare.”

Ja dhe teksti i plotë i Propozimit të BE pa mashtrimet e kriminelit Aleksandar Vuçiç:

Dialogu Beograd-Prishtinë: Propozimi i BE-së – Marrëveshja për rrugën e normalizimit ndërmjet Kosovës dhe Serbisë

27.02.2023 Bruksel

Palët Kontraktuese,

Të vetëdijshëm për përgjegjësinë e tyre për ruajtjen e paqes,

Të përkushtuar për të kontribuar në bashkëpunimin dhe sigurinë e frytshme rajonale në Evropë dhe për të kapërcyer trashëgiminë e së kaluarës,

Të vetëdijshëm se paprekshmëria e kufijve dhe respektimi i integritetit dhe sovranitetit territorial dhe mbrojtja e pakicave kombëtare janë kusht themelor për paqen,

Duke u nisur nga faktet historike dhe pa paragjykuar pikëpamjet e ndryshme të Palëve për çështjet themelore, duke përfshirë çështjet e statusit,

Me dëshirën për të krijuar kushtet për bashkëpunim ndërmjet Palëve në dobi të qytetarëve,

Kanë rënë dakord si më poshtë:

Neni 1

Palët do të zhvillojnë marrëdhënie normale, të fqinjësisë së mirë me njëra-tjetrën mbi bazën e të drejtave të barabarta.

Të dyja Palët do të njohin reciprokisht dokumentet e tyre përkatëse dhe simbolet kombëtare, duke përfshirë pasaportat, diplomat, targat dhe vulat doganore.

Neni 2

Të dyja palët do të udhëhiqen nga qëllimet dhe parimet e përcaktuara në Kartën e Kombeve të Bashkuara, veçanërisht ato të barazisë sovrane të shteteve, respektimit të pavarësisë, autonomisë dhe integritetit territorial të tyre, të drejtën e vetëvendosjes, mbrojtjen e të drejtave të njeriut, dhe mosdiskriminimin.

Neni 3

Në përputhje me Kartën e Kombeve të Bashkuara, Palët do të zgjidhin çdo mosmarrëveshje ndërmjet tyre ekskluzivisht me mjete paqësore dhe do të përmbahen nga kërcënimi ose përdorimi i forcës.

Neni 4

Palët nisen nga supozimi se asnjëra nga të dyja nuk mund të përfaqësojë palën tjetrën në sferën ndërkombëtare ose të veprojë në emër të saj.

Serbia nuk do të kundërshtojë anëtarësimin e Kosovës në asnjë organizatë ndërkombëtare.

Neni 5

Asnjëra palë nuk do të bllokojë, as nuk do të inkurajojë të tjerët të bllokojnë, përparimin e palës tjetër në rrugën e tyre përkatëse në BE bazuar në meritat e tyre. Të dyja palët do të respektojnë vlerat e referuara në nenet 2 dhe 21 të Traktatit të Bashkimit Evropian.

Neni 6

Përderisa kjo Marrëveshje bazë përbën një hap të rëndësishëm normalizimi, të dyja palët do të vazhdojnë me një shtysë të re procesin e dialogut të udhëhequr nga BE-ja, i cili duhet të çojë në një marrëveshje ligjërisht të detyrueshme për normalizimin e plotë të marrëdhënieve të tyre. Palët bien dakord të thellojnë bashkëpunimin e ardhshëm në fushat e ekonomisë, shkencës dhe teknologjisë, transportit dhe nderlidhjes, marrëdhënieve gjyqësore dhe të zbatimit të ligjit, postave dhe telekomunikacionit, shëndetësisë, kulturës, fesë, sportit, mbrojtjes së mjedisit, personave të zhdukur, personave të zhvendosur dhe të tjera të ngjashme, përmes arritjes se marreveshjeve specifike. Detajet do tëdarkordohen në marrëveshjet shtesë të ndërmjetësuara në dialogun e udhëhequr nga BE.

Neni 7

Të dyja palët angazhohen të krijojnë marrëveshje dhe garanci specifike, në përputhje me instrumentet përkatëse të Këshillit të Evropës dhe duke u mbështetur në përvojat ekzistuese evropiane, për të siguruar një nivel të duhur të vetë-qeverisjes për komunitetin serb në Kosovë dhe aftësinë për ofrimin e shërbimeve në fusha specifike, duke përfshirë mundësinë e mbështetjes financiare nga Serbia dhe një kanal të drejtpërdrejtë komunikimi për komunitetin serb me Qeverinë e Kosovës. Palët do të zyrtarizojnë statusin e Kishës Ortodokse Serbe në Kosovë dhe do të ofrojnë nivel të fortë mbrojtjeje për objektet e trashëgimisë fetare dhe kulturore serbe, në përputhje me modelet ekzistuese evropiane.

Neni 8

Palët do të shkëmbejnë Misionet e Përhershme. Ato do të vendosen në selitë përkatëse qeveritare. Çështjet praktike në lidhje me themelimin e Misioneve do të trajtohen veçmas.

Neni 9

Të dyja palët marrin parasysh angazhimin e BE-së dhe donatorëve të tjerë për të krijuar një paketë të veçantë investimi dhe mbështetje financiare për projektet e përbashkëta të Palëve në zhvillimin ekonomik, nderlidhjen, tranzicionin e gjelbër dhe fusha të tjera kyçe.

Neni 10

Palët do të krijojnë një Komision të përbashkët, të kryesuar nga BE-ja, për monitorimin e zbatimit të kësaj Marrëveshjeje. Të dyja palët konfirmojnë detyrimin e tyre për të zbatuar të gjitha marrëveshjet e dialogut nga e kaluara, të cilat mbeten të vlefshme dhe detyruese.

Neni 11

Të dyja palët angazhohen të respektojnë Udhërrëfyesin e Zbatimit në aneks të kësaj Marrëveshje.