Serbia ndalon filma shqiptarë në Luginën e Preshevës, Ministri Çeku: Mosdurim nacional!
Duke e vlerësuar të paprecedent dhe të papranueshëm ndalimin e shfaqjes së dy filmave shqiptarë në Luginën e Preshevës nga autoritetet e Serbisë, vetëm pse janë financuar nga Qeveria e Kosovës, Ministri i Kulturës, Rinisë dhe Sportit i Kosovës, Hajrullah Çeku, tha se ky akt më e pakta që mund të emërohet është, mosdurim nacional
“I paprecedent dhe i papranueshëm rasti i mbrëmshëm në Komunën e Bujanocit, ku u ndalua shfaqja e dy filmave në Shtëpinë e Kulturës. Një ditë para shfaqjes së filmave, policia e Serbisë i merr në bisedë informative drejtorin e Shtëpisë së Kulturës në Bujanoc, producentin dhe aktorët e filmave.
Pa asnjë motiv konkret, e madje duke e paragjykuar përmbajtjen e filmave, autoritetet serbe ndalojnë shfaqjen e filmave deri në një vendim të radhës,” shprehet ministri Çeku në reagimin e tij përmes rrjetit social Facebook duke shtuar se ky akt më e pakta që mund të emërohet, është mosdurim nacional.
“Ky akt më e pakta që mund të emërohet, është mosdurim nacional. E për fat të keq ka ende qarqe politike brenda, në rajon e jashtë që besojnë në ndryshimin e Serbisë,” shprehet Ministri i Kulturës, Rinisë dhe Sportit i Kosovës, Hajrullah Çeku, në reagimine tij duke përfuduar:
“Pikërisht politizimi nga ana e Serbisë edhe i artit, me të vetmin motiv që filmi është me aktorë shqiptarë dhe mbështetet nga Qeveria e Republikës së Kosovës, është përgënjeshtrimi më i madh që Serbia ka ndryshuar, apo se mund të ndryshojë.”
Ndryshe, dje më 9 qershor, Policia e Serbisë në Bujanoc, ka shoqëruar në stacionin policor drejtorin e Shtëpisë së Kulturës, Jetmir Ismaili, si dhe ka intervistuar aktorin Gani Veseli. Me vendim të autoriteteve serbe filmat nuk do të mund të shfaqën deri në përfundim të hetimeve.
Ky projekt ishte njëri nga 78 projektet e Qeverisë së Kosovës që i mbështeti financiarisht përmes Këshillit Kombëtar Shqiptar, duke vlerësuar se bartnin aktivitete në ruajtjen dhe kultivimin, avancimin e artit, gjuhës, arsimit e identitetit kombëtar shqiptar në Luginën e Preshevës.
