Serbia pezullon eksportet e grurit, miellit, misrit e vajit
Presidenti i Serbisë, Aleksandar Vuçiç, tha se shteti i serb do të pezullojë eksportin e grurit, miellit, misrit dhe vajit nga e enjtja e 10 marsit.
“Në dy ditët e fundit, eksporti i grurit dhe miellit është rritur aq shumë, saqë duhet ta ndalojmë,” tha Vuçiç duke folur për televizionin serb B92, ndërsa shtoi se shteti do t’i subvencionojë derivatet për fermerët.
“Ne do të subvencionojmë që çmimi i euro-naftës në të gjitha pikat e karburantit të Industrisë së Naftës së Serbisë të mbetet së paku 179 dinarë [rreth 1.5 euro] për të paktën një muaj e gjysmë. Për të gjithë të tjerët do të ketë rritje minimale,” citon Presidentin e Serbisë, RFE.
Vuçiq shtoi se Serbia është në pritje të vendimit të Bashkimit Evropian për importin e energjisë nga Rusia.
Shtetet e Bashkuara e ndaluan atë të martën, si ndëshkim për Rusinë, e cila ka pushtuar Ukrainën.
“Nëse vendimi është që të ndalohet importi i të gjitha burimeve të energjisë nga Rusia, atëherë edhe ne jemi në telashe. Nuk kemi ku t’i marrim, nafta dhe gazi nuk mund të bien nga qielli”, tha Vuçiq.
Duke folur për gjendjen e rezervave të mallrave të Serbisë, më 2 mars, Vuçiç tha se Serbia është e përgatitur për së paku dy muajt e ardhshëm.
Sipas INSTAT, në Shqipëri u importuan 326 milionë kg drithëra, nga të cilat 36% erdhën nga Serbia dhe 46% nga Rusia. Importuesit e drithërave dhe përpunuesit e miellit pohuan se që nga fillimi i luftës, importet e drithërave nga Rusia u diversifikuan, teksa gjetën tregje të tjera në Europë (Bullgari, Francë, Rumani, Itali) dhe në Amerikën Latine. Për importet e grupmallit “Vajra dhe dhjamra kafshore apo vegjetale”, nga Serbia në 2021 erdhi rreth 6% e totalit të importeve.
Ndërkohë Kosova, sipas RFE, gjatë vitit 2021, ka importuar 84 mijë tonë lloje të ndryshme të grurit dhe miellit nga Serbia – nga 115 mijë tonë sa ka importuar në total nga shtete të ndryshme, si: Kroacia, Austria, Maqedonia e Veriut, Hungaria.
Pas pushtimit të Ukrainës nga Rusia, më 24 shkurt, Serbia ka mbështetur integritetin territorial të Ukrainës, por nuk u është bashkuar sanksioneve që BE-ja ka vendosur kundër Moskës.
