Serbia po ndërhyn në procesin zgjedhor, Kurti: Ftojmë BE të sanksionojë!

Pushteti në Serbi po tenton të ndërhyjë në procesin zgjedhor në Kosovë, tha sot Kryeministri në detyrë, Albin Kurti, ndërsa kërkoi reagim dhe sanksionim nga institucionet e Bashkimit Evropian.

“Premtimet për vende pune, kushtëzimi dhe shantazhi me beneficione sociale, deklarimet e zyrtarëve të lartë të Serbisë se vetëm Lista Serbe e mbron Serbinë në Kosovë, siç bëri së fundmi ish-kryeministri i Serbisë, tash këshilltari i presidentit atje, Milosh Vuçeviç janë metoda të përsëritura të ndërhyrjes së Serbisë në procesin zgjedhor në Kosovë,” tha Albin Kurti në mbledhjen e sotme të qeverisë duke e quajtur këtë ndërhyrje në procesin komunal zgjedhor si cenim të demokracisë dhe sovranitetit.

“Serbia nuk ka pasur asnjë pasojë nga BE andaj nuk po ndryshon. Kjo ndërhyrje është edhe më e rëndë sesa ajo e Rusisë në Evropë. I bëjmë thirrje BE-së që ta dënojnë ndërhyrjen e Beogradit dhe ta sanksionojë Serbinë, shtet ky kandidat për anëtarësim në BE për veprimet të cilat bien ndesh me parimin e fqinjësisë së mirë dhe shkelin marrëveshjen e Brukselit!”

Në mbledhjen e sotme Qeveria ka miratuar vendimin për ndarjen e bursës së mobilitetit për nivelin Bachelor, si përkrahje për studentët me kushte ekonomike më të dobëta. Qeveria në detyrë ka ndarë 100 eurove për të gjithë studentët, përkatësisht, gjithësej 26 milionë euro.

Gjithashtu Qeveria e Kosovës ka miratuar Programin për Mbrojtjen e Konsumatorëve të Cenueshëm të Energjisë Elektrike, të propozuar nga Ministria e Financave, Punës dhe Transfereve, me qëllim mbështetjen e familjeve me të ardhura të ulëta gjatë sezonit të dimrit. Do të përfitojnë familjet që kanë të ardhura më të ulëta se 150 euro në muaj për person. Vitin e kaluar ishin mbi 80 mijë familje përfituese