Serbia tërheq vendimin Mali i Zi jo, nesër ambasadori serb duhet të largohet

Mali i Zi nuk do ta tërheqë vendimin për dëbimin e Ambasadorit të Serbisë në Podgoricë, Vlladimir Bozhoviç. Të gjitha procedurat në lidhje me dëbimin e Bozhoviçit kanë përfunduar dhe se ai duhet ta lëshojë territorin malazez më së largu më 1 dhjetor shprehet Ministria e Punëve të Jashtme e Malit të Zi.

Duke komentuar vendimin e Serbisë për të tërhequr vendimin për dëbimin e ambasadorit malazez, Ministria e Jashtme e Malit të Zi thotë për RFE se ambasadori, Tarzan Millosheviç përfaqëson vendin e tij, duke respektuar Republikën e Serbisë, pa ndërhyrë në punët e saj të brendshme, “ndryshe nga ambasadori serb në Malin e Zi, i cili vazhdimisht ka vënë në dyshim pavarësinë e Malit të Zi me interpretimet e tij të historisë”.

Teksa ka bërë të ditur lajmin për tërheqje të vendimit për dëbim të Ambasadorit të Malit të Zi, kryeministrja e Serbisë, Ana Bërnabiç, tha se “raportet e mira me Malin e Zi janë mbi të gjitha më të rëndësishmet për ne”.

Presidenti serb, Aleksandar Vuçiç tha se Serbia ka bërë një veprim të mirë duke shtuar se i takon asaj të tregojë se dëshiron raporte të mira dhe vëllazërore me Malin e Zi.

Serbia e shpalli Ambasadorin e Malit të Zi, person non grata dhe urdhëroi dëbimin e tij nga vendi më 28 nëntor, pasi të njëjtin veprim e kishte bërë Mali i Zi me ambasadorin serb në Podgoricë.

Ndryshe, Kryeministri në ardhje i Malit të Zi, Zdravko Krivokapiç më herët e kritikoi qeverinë në largim për vendimin, vetëm disa ditë para se të votohet nga parlamenti qeveria e re, që ka një orientim pro-serb.

“Akte të tilla nuk janë në frymën e rrugës evropiane dhe bashkëpunimit të mirë rajonal të vendeve mike,” tha Krivokapiç në reagimin e tij përmes rrjetit social Twitter duke shtuar se regjimi në largim, madje edhe në ditët e tij të fundit, nuk iu shmang polarizimit të shoqërisë dhe thellimit të ndarjeve.

Si arsye për shpalljen person non grata dhe dëbimin e ambasadorit serb, ministria e Jashtme e Malit të Zi përmendi ndërhyrjen e gjatë dhe të vazhdueshme në punët e brendshme të Malit të Zi.

Mali i Zi mbetet thellësisht i ndarë midis atyre që kërkojnë lidhje më të ngushta me aleatët tradicionalë: Serbinë dhe Rusinë, dhe ata që e shohin Malin e Zi si një shtet të pavarur aleat me Perëndimin.

Mali i Zi dhe Serbia ishin pjesë e një vendi të përbashkët para një referendumi më 2006 që çoi në pavarësimin e Malit të Zi.

Vendi tani do të drejtohet nga një koalicion pro-serb që do të votohet gjatë një seance parlamentare këtë javë, pas humbjes së Partisë Demokratike të Socialistëve pro-Perëndimore në pushtet.

Partia më e fuqishme e koalicionit është Fronti Demokratik, DF, i cili kërkon lidhje më të ngushta me Serbinë dhe Rusinë dhe mbështetet nga Kisha Ortodokse Serbe.

Partnerët e tij, megjithatë, raporton RFE, insistojnë që Mali i Zi të mbetet në kursin e tij pro-perëndimor.

Krivokapiç tha se qeveria e re do të punojë për të përmirësuar marrëdhëniet e Malit të Zi me Serbinë.

“Ne do të promovojmë një politikë fqinjësie të mirë me Beogradin, si dhe me të gjithë në rajon, mbi parimin e sovranitetit, pavarësisë dhe mosndërhyrjes në punët e brendshme të vendeve të tjera”, shkroi Krivokapiç.