Sesioni i ri/ Në mesditë, Kryesia vendos për fatin e seancës së orës 17:00

Sot hapet sesioni i tretë i Legjislasturës së nëntë të Parlamentit të Shqipërisë, me seancën plenare e cila fillon në orën 17:00.

Bazuar në urdhërin e kryetarit të Parlamentit, janë parashikuar pesë pika të rendit të ditës, ndërkohë ende nuk dihet nëse PD do të jetë prezente mesditën e së hënës në mbledhjen e Konferencës së Kryetarëve, ku miratohet edhe kalendari i punimeve të Parlamentit.

Sipas një draftkalendari që ka dalë në media, mazhoranca parashikon që më 13 shtator të kalojë në seancë dekretin e Presidentit i cili e ktheu për rishqyrtim Ligjin për Teatrin e ri Kombëtar. Ndonëse mazhoranca që në muajin korrik u shprehë qartë se do ta rrëzojë dekretin presidencial, opozita e konsideron si “vijë të kuqe”.

Për këtë qëllim, në selinë blu Lulzim Basha do të takojë aleatët e tij dhe do të mbledhë grupin parlamentar të PD-së rreth orës 10:00, ku do të dihet nëse do të kemi edhe në këtë sesion një marrëdhënie të kushtëzuar me Parlamentin.

Nga ana tjetër, kryesia e PS ka parashikuar një mbledhje në orën 9:00 ku është paralajmëruar të zyrtarizohet thirrja për Asamblenë Kombëtare për të premten e 7 shtatorit. Mbledhje kjo ku pritet që Edi Rama të bëjë publike nëse do të ketë ose jo ndryshime në kabinetin qeveritar.

Seanca plenare

E hënë, 3.9.2018, ora 17.00

Rendi i ditës

Bazuar në urdhrin nr. 28, datë 29.8.2018 të Kryetarit të Parlamentit Gramoz Ruçi, rendi i ditës është si më poshtë vijon:

1.Hapja e Sesionit të III – të të Legjislaturës së IX –të të Parlamentit të Shqipërisë

2.Miratimi i procesverbalit të seancës plenare të datës 23.7.2018 (neni 44, pika 2 e Rregullores)

3.Njoftimi i projektligjeve të depozituara në Parlament (neni 44, pika 3 e Rregullores)

4.Miratimi i programit 6 javor të punës së Parlamentit për periudhën 3 shtator – 12 tetor 2018 (neni 26, pikat 5, 6 të Rregullores, votim me shumicë të thjeshtë)

5.Miratimi i kalendarit 3-javor të punimeve të Parlamentit për periudhën 3 – 21 shtator 2018 (neni 27, pikat 3, 4 të Rregullores, votim me shumicë të thjeshtë)