Shantazhuesja e Roskovecit, Noka në SPAK: Hetim penal ka për znj.Bufi dhe çështjen Aktivisti!

Pas paraqitjes në SPAK të disa padive të PD në lidhje me krimet zgjedhore, sot është ftuar në Prokurorinë e Posaçme, Sekretari i Përgjithshëm i Partisë Demokratike, Flamur Noka, për të diskutuar në lidhje me dy çështje: Kryetaren e Bashkisë Roskovec, Majlinda Bufi si kërcënuese, shantazhuese e qytetarëve për t’iu devijuar me dhunë votën dhe për të famshmen çështje të Aktivistit që po ashtu shantazhonte, kërcënonte dhe survejonte administratën.

“Siç jeni në dijeni në këtë fushatë zgjedhore rilindja ka bërë një batërdi dhe në këtë aspekt ne kemi monitoruar dhe kemi paraqitur në SPAK një mori padish për këtë batërdi. Sot isha për të diskutuar në lidhje me dy çështje. Në lidhje me znj. Majlinda Bufi si kërcënuese, shantazhuese e qytetarëve për t’iu devijuar me dhunë votën dhe për të famshmen çështjes të Aktivistit që po ashtu shantazhonte, kërcënonte dhe survejonte administratën. Këto të dyja janë krime të rënda zgjedhore dhe ne do t’i shkojmë deri në fund,” tha Flamur Noka duke bërë të ditur se të gjitha provat që disponojmë janë dorëzuar dhe çdo dokument që do të disponojnë do ta paraqesim ndërsa shtoi:

“Hetim penal ka për çështjen e Aktivistit dhe znj. Bufi. Vota me dhunë dhe me presion duhet të marrë fund, vota duhet të jetë e lirë,”

Në fund, Sekretari i Përgjithshëm i Partisë Demokratike, Flamur Noka, tha se Koalicioni “Bashkë Fitojmë” në këto zgjedhje nuk kishte përballë vetëm rilindjen, por shtetin me të gjitha mekanizmat, krimin, paratë e krimit e korrupsionit, si dhe Prokurorinë dhe Policinë qe ishin në shërbim të krimit.