SHBA dënon shkatërrimin e pronave të personave që pajisen me targa RKS
Shtetet e Bashkuara kanë dënuar djegien apo shkatërrimin e pronave të atyre personave që synojnë të riregjistrojnë makinat e tyre në RKS.
“SHBA dënojnë djegien ose shkatërrimin e pronës dhe çdo përpjekje për të frikësuar ata që kanë ose synojnë të marrin targa të makinave RKS sipas ligjit të Kosovës. Këto janë vepra frikacake dhe kriminale,” shprehet Ambasadori amerikan në Kosovë, Jeffrey Hovenier, në reagimin e tij përmes rrjetit social Twitter duke shtuar.
“Ne ritheksojmë kërkesën tonë për një zgjatje të plotë të periudhës së zbatimit në mënyrë që tabelat RKS të mund të instalohen gjatë 12 muajve duke pohuar se Kosova ka të drejtë të zbatojë këtë ndryshim.”
Ndryshe, sot Policia e Kosovës ka njoftuar se në orët e hershme të mëngjesit ka pranuar informacione për vënien e zjarrit dhe djegien e një makine me targa RKS në Zubin Potok, pronar i së cilës ka qenë një qytetar i komunitetit serb.
Ky njoftim vjen një ditë pasi Qeveria e Kosovës ka nisur të zbatojë planin në tri faza për riregjistrimin e makinave me targa ilegale serbe në RKS.
Faza e parë parashikon qortimin e shoferëve, faza e dytë gjobë deri në 150 euro për ata shoferë, dhe e treta targa provuese. Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS.
