SHBA dhe Britania: Spiunazhi kinez, kërcënim i madh për Sigurinë Kombëtare

Krerët e agjencive të zbatimit të ligjit në Shtetet e Bashkuara dhe Britani kanë lëshuar një paralajmërim të përbashkët për spiunazhin kinez, duke theksuar se përpjekjet e Pekinit përbëjnë kërcënimin më të madh në terma afatgjatë.

Gjatë një paraqitjeje në Londër, raporton RFE, së bashku me drejtorin e FBI-së, Christopher Wray, kreu i MI5, Ken McCallum, tha se Agjencia britanike ka dyfishuar përpjekjet kundër aktivitetit shqetësues kinez.

“Qeveria kineze dhe presioni i fshehtë i saj në mbarë botën përbën sfidën më të madhe që ne përballem,” tha ai duke shtuar:

“Kjo mund të duket abstrakte. Por, është e vërtetë dhe është urgjente”, tha McCallum. “Ne duhet të flasim për këtë çështje, ne duhet të veprojmë.”

Shefi i Byrosë Federale të Hetimeve, FBI, Christopher Wray, u pajtua me këto qëndrime, teksa tha se Pekini “paraqet kërcënimi më të madh në terma afatgjatë” për ekonominë dhe sigurinë kombëtare të Londrës dhe Washingtonit, dhe të aleatëve në Evropë e gjetkë.

“Qeveria kineze po tenton ta formësojë botën duke ndërhyrë në politikën tonë dhe të aleatëve tanë,” tha Wray, teksa foli në selinë e MI5 në Londër.

Programi i hakimit i Qeverisë kineze “është më i madh se i shteteve të mëdha marrë së bashku”, tha Wray.

Kjo paraqitje e përbashkët e dy zyrtarëve tregon se sa sfidë të madhe e konsiderojnë Qeverinë kineze dhe inteligjencën e saj SHBA dhe Britania.

Një zëdhënës i Ambasadës kineze në Londër, raporton RFE, hodhi poshtë komentet.

“Këto pretendime ndaj Kinës nga zyrtarët e inteligjencës amerikane dhe britanike janë krejtësisht të pabaza dhe të ashtuquajturat raste që kanë përmendur janë një përndjekje e pastër,” tha ky zëdhënës për Reuters.

Londra dhe Washingtoni duhet të “heqin dorë nga mentaliteti i Luftës së Ftohtë i cili ka dalë nga moda, dhe duhet të ndalojnë së krijuari konfrontime dhe konflikte,”, tha ky zyrtar i Ambasadës kineze në Londër.