SHBA dhe Korea Jugore në stërvitje të përbashkët ushtarake
Shtetet e Bashkuara dhe Korea Jugore kanë nisur sot stërvitje ushtarake, disa ditë para vizitës së planifikuar të Sekretarit amerikan të Shtetit, Mike Pompeo me zyrtarë verikoreanë në New York, raporton RFE.
Programi i forcave detare koreane për shkëmbim ka qenë pjesë e stërvitjeve të pezulluara në muajin qershor, pasi presidenti amerikan, Donald Trump pati premtuar ndalimin e stërvitjeve ushtarake, pas mbajtjes së samitit me liderin verikorean, Kim Jong Un në Singapor.
Stërvitjet e mëdha vazhdojnë të jenë të pezulluara, mirëpo Uashingtoni dhe Seuli kanë vazhduar të realizojnë stërvitje të përbashkëta të shkallës më të vogël.
Në stërvitjet e tanishme janë duke marrë pjesë 500 marinsa amerikanë dhe jugkoreanë, afër qytetit Pohang.
Ministri koreanojugor i Mbrojtjes tha se Seuli dhe Washingtoni do të vendosin para përfundimit të vitit, nëse do të realizojnë stërvitje masive ushtarake vitin e ardhshëm.
Ndërkohë Pompeo ka thënë për televizionin CBS se në ditët e ardhshme do të takohet me homologun e tij verikorean, Kim Yong Chol, për të diskutuar kërkesat amerikane ashtu që Phenjani të denuklearizohet dhe për plane tjera, duke përfshirë mbajtjen e një samiti të dytë mes liderëve të të dyja shteteve.
“Shpresoj se do të arrijmë përparim, duke përfshirë përpjekjet për t’u siguruar se do të ndodhë një samit i dytë në mes të dy liderëve, ku mund të shtyjmë përpara çështjen e denuklearizimit”, ka shtuar ai.
Trump dhe Kim patën bërë zotime të mëdha në aspektin e denuklearizimit të Gadishullit Korean, mirëpo nga mbajtja e samitit është arritur pak përparim.
