SHBA do të vazhdojë ta mbështesë FSK-në me pajisje ushtarake
Ambasada e Shteteve të Bashkuara në Kosovë do të vazhdojë ta mbështesë Forcën e Sigurisë së Kosovës, FSK, në përvetësimin e pajisjeve ushtarake amerikane, duke promovuar kështu bizneset amerikane dhe lidhjet tregtare midis SHBA-së dhe Kosovës, tha një zëdhënës i ambasadës në Prishtinë për RFE.
Bashkëpunimi i fuqishëm ushtarak midis Shteteve të Bashkuara dhe Kosovës, sipas tij, po e ndihmon FSK-në të arrijë vetëmjaftueshmëri dhe ta bëjë Kosovën një kontribuuese kyç për stabilitetin rajonal dhe global.
“Shtetet e Bashkuara mbështesin plotësisht tranzicionin 10-vjeçar të Forcës së Sigurisë së Kosovës në një forcë mbrojtëse territoriale shumetnike, profesionale dhe të ndërveprueshme me NATO-n, e aftë për të rritur sigurinë rajonale dhe për të promovuar interesat e sigurisë së SHBA-së,” tha zëdhënësi i Ambasadës amerikane në Prishtinë.
Kështu e vlerësojnë Shtetet e Bashkuara fazën aktuale të transformimit të Forcës së Sigurisë së Kosovës në një forcë ushtarake dhe rolin që SHBA parashikon të luajë në fazën përfundimtare të këtij transformimi, proces dhjetëvjeçar të cilin FSK e nisi në vitin 2018, pas miratimit të ligjeve përkatëse nga Parlamenti i Kosovës, të cilat i hapën rrugë transformimit të saj në ushtri me kapacitete të plota.
Që atëherë, Shtetet e Bashkuara e kanë mbështetur këtë hap, duke e cilësuar tranzicionin si “historik” dhe duke konfirmuar angazhimin për zhvillimin profesional të forcës – ndryshe nga NATO-ja, e cila e ka konsideruar vendimin “të papërshtatshëm në kohë”, për shkak të marrëdhënieve të tensionuara mes Kosovës dhe Serbisë.
Zyrtarë të Ministrisë së Mbrojtjes në Kosovë kanë konfirmuar për RFE se transformimi pritet të përfundojë në vitin 2028, sipas planit. Tash për tash po zhvillohen kapacitetet ajrore, po forcohen regjimentet luftarake dhe po punohet për të plotësuar komponentin e rezervës me 3.000 pjesëtarë, pasi objektivi për 5.000 trupa të rregullta është arritur tashmë.
Viteve të fundit, Kosova ka marrë ose blerë pajisje të ndryshme ushtarake nga SHBA-ja, përfshirë dronët RQ-20 Puma, raketat Javelin dhe automjetet Humvee.
Aktualisht, FSK po përgatitet të bashkohet me Forcën Ndërkombëtare Stabilizuese për Gazën, e cila është pjesë e planit për paqe në këtë rajon, të propozuar nga presidenti amerikan, Donald Trump./RFE/
