SHBA e gatshme për bisedime serioze me Iranin

Shtetet e Bashkuara shprehen se janë të gatshme të angazhohen pa parakushte në negociata serioze me Iranin. Zotimi vjen pasi SHBA-ja vrau komandantin ushtarak të Iranit, Qassem Soleimani, më 3 janar, ndërsa Irani u përgjigj me sulme në bazat amerikane në Irak, raporton RFE.

Në një letër dërguar Kombeve të Bashkuara, SHBA thekson se vrasja e Soleimanit ka qenë akt i vetëmbrojtjes.

Ambasadorja amerikane në OKB, Kelly Craft, në letrën dërguar Këshillit të Sigurimit të Kombeve të Bashkuara tha se SHBA është e gatshme të negociojë “me qëllim parandalimin e rrezikimit të mëtejshëm të paqes dhe sigurisë ndërkombëtare”.

Por, ambasadori i Iranit në OKB, Majid Takht Ravanchi, tha se oferta e SHBA-së për bisedime është “e pabesueshme” derisa SHBA-ja vazhdon me sanksione të ashpra kundër ekonomisë së Iranit.

Ndryshe, Qassem Soleimani është parë si zyrtari i dytë më i rëndësishëm i Iranit, pas udhëheqësit suprem, Ajatollah Ali Khamenei.

Si udhëheqës i forcës Kuds, ai ka qenë arkitekt i politikës së Iranit në rajon.