SHBA e gatshme të mbështesë MPB-në në qëllimet strategjike

Shefja e zyrës së INL-së pranë ambasadës amerikane në Prishtinë, Tamra Greig, inkurajoi Ministrinë Punëve të Brendshme që të fokusohet në arritjen e qëllimeve afatgjate dhe strategjike, për të cilat shprehu gatishmërinë që ta mbështesë Kosovën.

Duke e falënderuar për mbështetjen që ka dhënë për Republikën e Kosovës, në veçanti për institucionet e sundimit të ligjit në Kosovë, Ministri i Punëve të Brendshme të Kosovës, Xhelal Sveçla, në takim me Tamra Greig vuri në pah bashkëpunimin e shkëlqyer zyrën e INL në Prishtinë dhe Shtetet e Bashkuara.

Ministri Sveçla e njoftoi gjithashtu Greig për prioritetet e Qeverisë për sundimin e ligjit dhe luftën kundër krimit të organizuar dhe korrupsionit dhe për këtë ai theksoi se, pavarësisht arritjeve, Kosova ende ka nevojë për angazhim, për të cilat nevojitet përkrahja nga partnerët tanë.

Në fund, bashkëbiseduesit vlerësuan se bashkëpunimi i mirë mes dy institucioneve, jo vetëm që do të vazhdojë, por edhe do të rritet më tej.

Ndërsa Shefja e zyrës së INL-së pranë ambasadës amerikane në Prishtinë, Tamra Greig, falënderoi Kosovën për mbështetjen e ofruar, lidhur me politikat e SHBA-ve, sa i përket çështjes së Ukrainës.