SHBA e shqetësuar me deklaratat e presidentit bullgar për Krimenë

Shtetet e Bashkuara, SHBA, kanë shprehur shqetësim serioz lidhur me deklaratat e fundit të presidentit bullgar, Rumen Radev, i cili e ka cilësuar Krimenë si ruse.

Gadishulli ukrainas i Krimesë u aneksua nga Moska më 2014.

Radev, 58 vjeç, i bëri komentet gjatë një debati televiziv me kundërkandidatin e tij, Anastas Gerdzhikov, para rundit të balotazhit të zgjedhjeve presidenciale të mbajtura më 21 nëntor, të cilat Radev i fitoi.

Radev tha se Bullgaria duhet të mbajë raporte pragmatike me Moskën dhe nuk duhet ta shohë Rusinë si armike, për shkak të lidhjeve të ngushta historike dhe kulturore.

Gjatë debatit, raporton RFE, ai u pyet nga Gerdzhikov nëse pendohet për kritikat që i ka bërë ndaj sanksioneve që Bashkimi Evropian ka vendosur ndaj Rusisë, për shkak të aneksimit të Krimesë dhe Radev u përgjigj që Krimea “për momentin është ruse”, duke shtuar “çfarë tjetër mund të jetë?”