SHBA e zemëruar nga sulmi me raketë në Irak

Shtetet e Bashkuara janë zotuar për të mbajtur përgjegjës ata që kanë përgjegjësi për sulmin e së hënës me raketë në rajonin Kurdistan të Irakut, i cili ka lënë të vdekur një kontraktor civil.

Një anëtar i shërbimit amerikan dhe pesë kontraktorë tjerë janë plagosur kur raketa ka goditur qytetin Irbil, përfshirë një bazë të përdorur nga koalicioni i udhëhequr nga SHBA-ja.

Përmes një deklarate, Sekretari amerikan i Shtetit, Antony Blinken tha se Washingtonin e ka zemëruar sulmi.

Një grup pro-iranian është thënë të ketë nisur sulmin.

Milicia Gardianët e Brigadave të Gjakut, është thënë se ka shënjestruar “pushtimin amerikan” raporton e përditshmja amerikane, Washington Post.

Kontraktorët e vrarë dhe të plagosur besohet se kanë shtetësi të huaj.

Autoritetet lokale kurde, raporton RFE, janë shprehur se tre persona në Irbil janë plagosur dhe se njëri është në gjendje kritike.

Aeroporti i këtij qyteti është mbyllur pas sulmit.

Presidenti irakian, Barham Salih, tha se sulmi ka qenë terrorist, duke paralajmëruar për përshkallëzim të rrezikshëm të dhunës në rajon.

Ky besohet se është sulmi i parë me raketë ndaj shënjestrave perëndimore në Irak, prej kur presidenti amerikan, Joe Biden nisi punën një muaj më parë.