SHBA, është vrarë organizatori i sulmit kamikaz në Kabul

SHBA ka kryer një sulm me avionë pa pilot kundër organizatorit të sulmit, Shtetit Islamik, në lindje të Afganistanit, vetëm një ditë pas sulmit kamikaz në Aeroportin e Kabulit ku mbetën të vrarë 13 ushtarë amerikanë dhe dhjetëra civil afganë.

Shteti Islamik Khorasan, ISIS-K, degë e militanatëve që më parë kanë luftuar kundër forcave amerikane në Siri dhe Irak, ka marrë përgjegjësinë për sulmin e së enjtes ku mbetën të vrarë mbi 90 afganë në përpjekje për tu larguar nga vendi.

Përveç 13 ushtarëve të vrarë amerikanë, 18 mbetën të plagosur dhe u transportuan në Gjermani, raporton Agjencia e lajmeve Reuters.

Ndryshe, në Aeroportin e Kabulit ndodhen rreth 5000 ushtarë amerikanë që po ndihmojnë në evakuimin e qytetarëve amerikanë, afganëve të kërcënuar si dhe të nacionaliteteve tjera. 

Evakuimi i civilëve dhe ushtarëve, bazuar në marrëveshjen me talibanët, duhet të përfundoj më 31 Gusht.