SHBA: Evropës i mungon vetëbesimi! Kallas: E vërtetë!

Përfaqësuesja e Lartë për Politikë të Jashtme dhe Siguri e Bashkimit Evropian, Kaja Kallas, tha sot se Shtetet e Bashkuara mbeten aleati më i madh i Evropës, edhe pasi u zbulua dokumenti startegjik ku Administrata Trump vlerëson se Evropa po përballet me “zhdukjen e qytetërimit” dhe një ditë mund të humbasë statusin e saj si një aleat i besueshëm.

Strategjia e re e Sigurisë Kombëtare të Shteteve të Bashkuara, e publikuar në faqen zyrtare të Shtëpisë së Bardhë pardje, kritikoi Bashkimin Evropian si antidemokratik dhe Evropën si një kontinent që i mungon vetëbesimi. Qëllimi i SHBA-së duhet të jetë “të ndihmojë Evropën të korrigjojë trajektoren e saj aktuale”, thekson dokumenti.

“Ka shumë kritika atje, por mendoj se disa prej tyre janë të vërteta, nëse shikoni Evropën, ajo e ka nënvlerësuar fuqinë e saj përballë Rusisë,” tha Kaja Kallas në një panel në Forumin e Dohas në Katar duke shtuar: “Ne duhet të jemi më të sigurt!”

Duke pranuar se jo gjithmonë ishin dakord me Shtetet e Bashkuara, ai mbetet aleati më i madh i BE-së.

“SHBA-të mbeten aleati ynë më i madh. Mendoj se nuk kemi rënë gjithmonë dakord për disa tema, por mendoj se parimi i përgjithshëm është ende aty,” tha Përfaqësuesja e Lartë për Politikë të Jashtme dhe Siguri e Bashkimit Evropian, Kaja Kallas, duke përfunduar:

“Ne jemi aleatët më të mëdhenj dhe duhet të qëndrojmë së bashku!”