SHBA i dhuron FSK-së 55 automjete të blinduara

“Sot është ditë historike për Kosovën, pasi që SHBA po i dhuron 55 automjete ushtarake për Ushtrinë tonë,” tha sot Presidentja e Kosovës, Vjosa Osmani, në ceremoninë e pranim-dorëzimit të automjeteve ushtarake të blinduara, të tipit M1117 ASV, Armored Security Vehicle, donacion i Shteteve të Bashkuara.

“Sot është një ditë e veçantë për popullin e Kosovës ngaqë partneri ynë strategjik, Shtetet e Bashkuara të Amerikës, po ua dhurojnë forcave tona të armatosura 55 automjete ushtarake në vlerë të madhe, të cilat do t’i ndihmojnë forcat tona të forcojnë më kapacitetet e veta dhe ta thellojnë edhe më tej ndërveprimin e ushtrisë sonë në ushtritë aleate,” tha Vjosa Osmani

Në ceremoninë e cila u zhvillua në kazermën “Adem Jashari” morën pjesë edhe Kryeministri i Kosovës, Albin Kurti, Ministri i Mbrojtjes, Armend Mehaj, autoritete të larta ushtarake civile vendore dhe ndërkombëtare.

Me pranimin e donacionit prej 55 automjeteve të blinduara nga SHBA, Kryeministri Albin Kurti tha se FSK po zhvillohet dhe kjo falë aleatëve strategjik që po ndihmojnë për sigurinë e vendit ndërsa shtoi se mbrojtja e territorit është interes vital dhe se të gjitha politikat do të bëhen në koordinim me NATO-n.

“Republika e Kosovës këto ditë është duke u përballur me sfida si rezultat i pandemisë globale. Institucionet po punojnë maksimalisht që kjo valë e re të kalojë me sa më pak dëme në ekonomi. Vendi ynë po mirëpret refugjatët afgane po mbështet paqen në lindjen e mesme ushtarakisht. FSK po jep kontribut të veçantë në këto zhvillime. Ministria e Mbrojtjes dhe FSK po punojnë pandalshëm për rritjen e kapaciteteve ushtarake,” tha Kurti duke shtuar: 

“Në rrugën e zhvillimit të ushtrisë sonë rol të rëndësishëm po luan ShBA dhe partnerët tjerë strategjik. Kjo mbështetje është vetëm një nga fushat ku ShBA-të po ndihmojnë për sigurinë e vendit tonë. Qeveria e Kosovës mbrojtjen e territorit e sheh si një interes vital shtetëror. Ne do të vazhdojmë të zhvillojmë politikat e mbrojtjes që të jenë të përputhshme me NATO-n me qëllim anëtarësimin në këtë organizatë,” tha Kryeministri i Kosovës, Albin Kurti duke vlerësuar se FSK i ka më të mëdha aftësitë se sa mundësit ndërsa përfundoj:

“Ne po ju bashkëngjisim pajisjet tjera ushtarake si këto pajisje moderne. Uroj që këto automjete të blinduara të përdorën në mënyrën më të mirë.”