SHBA kërkon tërheqjen e UNMIK-ut nga Kosova

SHBA i kërkon Sekretarit të Përgjithshëm të Kombeve të Bashkuara, Antonio Guterres, që UNMIK-u të tërhiqet nga Kosova.

Kërkesa është bërë nga Ambasadorja e SHBA në OKB, Nikki Haley, ndërkohë mediat serbe raportojnë se letra drejturar Sekretarit të Përgjithshë të OKB mbanë datën 9 tetor, ditën kur Ambasadorja Haley njoftoi tërheqjen e saj nga posti i ambasadores së Shteteve të Bashkuara në OKB.

Në dokumentin e publikuar, Haley mbështet përpjekjet e Guterres për arritjen e paqes në botë por thekson edhe faktin se misioni i Kombeve të Bashkuara në Kosovë ka sjellë shembull të misionit të suksesshëm në zgjidhjen e konfliktit.

“Suksesi i Kosovës i theksuar me dhjetëvjetorin e shpalljes së pavarësisë duhet të jetë arsye për festë dhe simbol i arritjes së madhe nga Kombet e Bashkuara në përpjekjet për arritjen e paqes dhe stabilitetit në Evropë”, thekson Ambasadorja Haley në letrën e saj.

Ambasadorja Haley kërkon “strategji të largimit” dhe ndërprerjen e mandatit të UNMIK-ut, që ka hasur në kundërshtim nga Serbia.

Ndaj kërkesës së saj ka reaguar Drejtori i Zyrës për Kosovën pranë qeveris së Serbisë, Marko Gjuriç, duke theksuar se realizimi i kërkesës së Haley do të ishte “shuplakë ndaj përpjekjeve për arritjen e paqes”, por edhe rikthim i presioneve politike.

“Serbia do ta kundërshtojë këtë iniciativë me të gjitha argumentet. Ligjore dhe politike,” tha Gjuriç.