SHBA mbështet rikthimin e Kosovës dhe Serbisë në dialog

Presidenti i Serbisë, Aleksandar Vuçiç, në takim me Ambasadorin e SHBA në Beograd, Kyle Scott, tha se Kosova ka braktisur dialogun për normalizimin e marrëdhënieve me Serbinë pa e përmbushur obligimin për formimin e Asociacionit të komunave me shumicë serbe, duke iu vënë taksë mallrave të importuara nga Serbia, duke miratuar një platformë për negociatat dhe duke formuar ushtrinë.

Aleksandar Vuçiç, raporton RFE, tha se bashkësia ndërkombëtare është dashur të merret më herët me problemet që kanë çuar në ndërprerjen e dialogut, në veçanti me përpjekjet për të shfuqizuar taksën mbi mallrat serbe.

“Nuk jam optimist, por nëse Prishtina e tërheq taksën, Serbia është e gatshme të bisedojë,” tha Vuçiç.

Nga ana tjetër, Ambasadori Scott tha se SHBA-ja e mbështet rikthimin te dialogu dhe se është e domosdoshme që të gjenden mënyra për vazhdimin e tij. Është interes i përbashkët i Serbisë dhe i Kosovës, si dhe i komunitetit ndërkombëtar, që të arrihet kompromisi, tha Scott.

Kosova u ka vënë taksë 100% prodhimeve të importuara nga Serbia dhe Bosnje Hercegovina qysh në nëntor të vitit të kaluar.

Kryeministri i Kosovës, Ramush Haradinaj, ka thënë se taksa do të mbetet në fuqi derisa Serbia ta njohë Kosovën, ndërsa Vuçiq ka thënë se dialogu nuk mund të vazhdojë pa u hequr taksa.

Thirrje për heqjen e kësaj tarife kanë bërë vazhdimisht Bashkimi Evropian dhe Shtetet e Bashkuara.