SHBA: Mbi 2.000 të vdekur brenda një dite nga koronavirusi

Shtetet e Bashkuara janë bërë shteti i parë në botë, që brenda një dite janë shënuar mbi 2 mijë vdekje nga koronavirusi.

Të dhënat e prezantuara nga Universiteti Johns Hopkins, raporton RFE, tregojnë se brenda 24 orëve në SHBA kanë vdekur 2.108 persona.

SHBA-ja shumë shpejt mund ta kalojnë Italinë sa i përket numrit të rasteve me fatalitet nga COVID-19.

Por, ekspertët në task forcën e Shtëpisë së Bardhë për COVID-19 thonë se ka nisur të bie niveli i përhapjes së koronavirusit në mbarë SHBA-në.

Presidenti amerikan, Donald Trump, tha se ai pret që SHBA të ketë një numër më të ulët vdekjesh sesa parashikimet fillestare prej 100.000 vdekjeve.

Sipas shifrave të fundit të publikuara nga Universiteti Johns Hopkins, në SHBA janë regjistruar 18.693 vdekje dhe 500.399 raste me COVID-19.