SHBA me krenari e konsideron Malin e Zi aleat
Shtetet e Bashkuara me krenari e konsiderojnë Malin e Zi aleatin e tyre, thekson sot Ambasada amerikane në Podgoricë, thekson televizioni publik malazez RTCG.
Presidenti i SHBA, Donald Trump në një intervistë për televizionin amerikan Fox news, në pyetjen e gazetarit pse djali i tij duhet të shkonte në Mal të Zi për ta mbrojtur nga sulmet, u përgjigj se “edhe vetë e kishte shtruar këtë pyetje”, me vlerësimin se “ky është shtet i vogël me njerëz shumë të fuqishëm dhe agresiv”.
E pyetur nga Agjencia e lajmeve “Mina” për deklaratën e Presidentit të SHBA, Ambasada amerikane thekson se Shtetet e Bashkuara me krenari e konsiderojnë Malin e Zi aleat. Ky vend, thekson Ambasada, luan një rol aktiv përmes kontributit të saj në misionet e Aleancës Veriatlantike në Afganistan dhe SHBA e përshëndesin edhe deklaratën e para pak kohe të Malit të Zi se mbështet NATO-n në Irak dhe Letoni.
“E rëndësishme është që anëtaret e NATO-s të plotësojnë detyrimet e tyre ndaj Aleancës dhe na vjen mirë që Mali i Zi është në rrugën drejtë për ti realizuar ato,” thekson Ambasada amerikane në Podgoricë duke shtuar se në Samitin e javës së kaluar në Bruksel, Presidenti Trump ka përsëritur angazhimin e fuqishëm amerikan në mbrojtjen kolektive të Aleancës.
Nga Ambasada e SHBA në Podgoricë theksojnë se Deklarata e samitit shprehet qartë se “çdo sulm ndaj një aleati do të konsiderohet sulm ndaj të gjithë neve, siç theksohet edhe në Nenin 5 të Marrëveshjes së Washingtonit”
Qeveria: Miqësia me SHBA e fortë dhe e qëndrueshme
Pas deklaratës së Presidentit Trump e cila u interpretua në mënyra të ndryshme, Qeveria e Malit të Zi ka miratuar del me qëndrimin se “Mali I Zi është krenar me historinë e tij dhe traditën dhe politikën paqdashëse e cila e ka bërë një shtet stabël në rajon dhe shtetin e vetëm ku nuk është luftuar në Ish-Jugosllavi”.
“Shteti i cili ka pranuar dhe mbrojtur 120.000 njerëz dhe familje fatkeqe. Shtet i cili është i pari në Evropë që i ka bërë rezistencë fashizmit dhe sot si shtet i ri i NATO-s dhe anëtar kandidat për BE, kontribuon në paqen dhe stabilitetin jo vetëm në kontinentin evropian por edhe në gjithë botën, së bashku me ushtarët amerikanë në Afganistan,” thekson Qeveria e Malit të Zi duke shtuar se ajo po ndërton miqësi por njëkohësisht është e aftë që me vendosmëri të mbrojë interesat kombëtare.
“Në botën e sotme me shumë sfida nuk është e rëndësishme se sa jeni të mëdhenj ose të vegjël por në çfarë mase i vlerësoni vlerat e lirisë, solidaritetit dhe demokracisë. Për të gjitha këto, miqësia dhe aleanca e Malit të Zi me Shtetet e Bashkuara është e fortë dhe e qëndrueeshme,” thekson Qeveria e Malit të Zi.
