SHBA miraton dërgimin e avionëve F-16 në Ukrainë

Shtetet e Bashkuara e kanë miratuar dërgimin e avionëve luftarakë F-16 në Ukrainë nga Danimarka dhe Holanda, në mënyrë që vendi të mbrohet nga pushtuesit rusë, në momentin kur përfundon trajnimi i pilotëve, tha një zyrtar amerikan.

Ukraina, raporton RFE, ka kërkuar vazhdimisht që të pajisjet me avionët amerikanë F-16 për ta luftuar ushtrinë ruse edhe nga ajri.

Washingtoni u ka dhënë garanci zyrtare Danimarkës dhe Holandës se Shtetet e Bashkuara do ta përshpejtojnë miratimin e kërkesës për dërgimin e avionëve në Ukrainë, sapo të përfundojë trajnimi i pilotëve, ka thënë ky zyrtar, pa u identifikuar.

“Ne e mirëpresim vendimin e Washingtonit për ta hapur rrugën drejt dërgimit të avionëve luftarakë F-16 në Ukrainë,” tha ministri i Jashtëm holandez, Wopke Hoekstra.

“Tani, ne do ta diskutojmë këtë çështje me partnerët tanë evropianë”.

Edhe Danimarka tha se do ta diskutojë këtë çështje.

“Qeveria e ka thënë disa herë se donacioni është hap i natyrshëm pas trajnimit. Ne jemi duke diskutuar këtë gjë me aleatët e ngushtë dhe pres që shumë shpejt të jemi më konkretë,” tha ministri danez i Mbrojtjes, Jakob Ellemann-Jensen.

Një koalicion prej 11 shtetesh pritet të nisë trajnimin e pilotëve ukrainas për përdorim të avionëve F-16 këtë muaj në Danimarkë.

Ministri në detyrë i Mbrojtjes në Danimarkë, Troels Poulsen, tha në muajin korrik se shteti pret “rezultate” nga trajnimi, në fillim të vitit 2024.

Presidenti amerikan, Joe Biden, e ka përkrahur programin e trajnimit për pilotët ukrainas qysh prej majit.

Përveç trajnimeve në Danimarkë, një qendër tjetër trajnuese ishte planifikuar të krijohej edhe në Rumani.

Një ditë më parë, Kievi deklaroi se nuk pret që këtë vjeshtë dhe dimër t’i sigurojë avionët F-16.

Zyrtarët amerikanë thanë privatisht se F-16 do të mund t’i ofrojnë pak ndihmë Ukrainës në kundërofensivën e saj aktuale, dhe nuk do ta ndryshojnë tërësisht rrjedhën e luftës, për shkak të situatës me qiej të kontestuar mbi Ukrainë.

Lufta në Ukrainë ka nisur më 24 shkurt 2022, raporton RFE. Presidenti rus, Vladimir Putin, e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.