SHBA, në Kongres shfaqet Drama “E majta radikale”
Komunistët janë të pafytyrë kudo, kështu ndodhi edhe në SHBA. Ndonëse dihet epilogu Dhoma e Përfaqësuesve e Kongresit amerikan miratoi mbrëmë dy akuza për shkarkimin e Presidentit Trump, duke luajtur një shfaqje të shëmtuar e cila dihet se do të bëhet nul nga Senati i cili për fatin e mirë të Shteteve të Bashkuara dhe Shqipërisë dominohet nga republikanët.
Mbrëmë votimi u nda qartë në vija partiake, por komunistët nuk u ndalën edhe pse dihej që do të ndahet edhe mbarë vendi për këtë çështje, pas fushatës së egër të sorosistëve. Komunistët ose siç i ka përkufizuar Presidenti Trump, e majta radikale, e akuzojnë presidentin e 45 për abuzim të pushtetit të zyrës së tij, pasi i kërkoi një vendi të huaj të hetojë rivalin e tij politik për zgjedhjet presidenciale të vitit 2020. Akuza e dytë është për pengim të hetimeve të Kongresit për këtë çështje.
Ligjvënësit demokratë thonë se Presidenti Trump duhet larguar nga detyra pasi përdori ndihmën për Ukraninën për interesat e tij personale politike. Demokrati Jerrold Nadler, Kryetar i Komisionit Juridik në Dhomën e Përfaqësuesve sheh madje edhe rrezikun.
“Cili është rreziku nëse nuk veprojmë? Gjatë 94 ditëve që nga fillimi i hetimeve nga Dhoma e Përfaqësuesve dhe realisht gjatë tre viteve të shkuara, një e vërtetë e padiskutueshme ka dalë: nëse nuk reagojmë ndaj abuzimit të pushtetit nga Presidenti Trump, abuzimi do të vazhdojë. Nuk mund të mbështetemi tek zgjedhjet për të zgjidhur problemin tonë kur Presidenti Trump kërcënon vetë integritetin e zgjedhjeve.”
Nga ana tjetër, republikanët argumentojnë se telefonata e presidentit me homologun ukrainas Volodymyr Zelenskiy ishte përpjekje për të trajtuar korrupsionin në Ukraninë dhe jo për avantazhe politike në Amerikë. Ata këmbëngulin se demokratët gjatë gjithë kohës kishin në mendje shkarkimin e Preaidentit Trump. Ligjvënësja republikane, Debbie Lesko, shprehet.
“Ata paracaktuan se do ta bënin dhe e bënë pavarësisht çdo gjëje. Ata nuk kishin asnjë provë, asnjë fakt por gjithsesi vepruan në të tyren. Ata po e coptojnë këtë vend.”
Dhe jo vetë kaq! Kreu i republikane në Dhomën e Përfaqësuesve, Kevin McCarthy thotë se kjo ka dobësuar Zyrën e Presidentit.
“Presidentit iu desh të publikonte për mbarë botën përmbajtjen e telefonatës. Kjo e ka dobësuar zyrën e presidentit, për këdo që vjen më pas. Cili udhëheqës botëror do të ndajë me presidentin amerikan qëndrime të vërteta dhe mirëkuptim dhe të mos frikësohet se biseda e tyre telefonike do të publikohet për tërë botën?”
Kështu, Demokratët duke pasur shumicën në Dhomën e Përfaqësuesve e nisën këtë shfaqje të shëmtuar dhe duke miratuar në fund akuzat edhe pse ishte e qartë se për shkarkimin e Presidentit duhen 2/3 e votave të Senatit prej 100 vendesh; Senat i cili kontrollohet nga republikanët dhe ku asnjë republikan nuk do të votojë për shkarkimin e presidentit.
Gjyqi ndaj presidentit do të zhvillohet në muajin janar në Senat, aty ku Presidenti i SHBA, Donald Trump do të shpallet i pafajshëm dhe perdet e Dramës “E majta radikale” do të mbyllen.
Ndryshe, deri sa Dhoma e Përfaqësuesve debatonte rreth akuzave, Presidenti Trump u shpreh përmes një postimi në Twitter se e gjitha kjo ishte “një gënjeshtër e shëmtuar e të majtës radikale, një sulm ndaj Amerikës dhe një sulm ndaj Partisë Republikane”.
