SHBA pajis FA/ Ambasadorja Moses-Ones: Shqipëria po rritet si udhëheqëse në Ballkan
SHBA i dhurojnë Forcave të Armatosura 37 mjete të blinduara. E Ngarkuara me Punë, Leyla Moses-Ones ndërsa përshëndeti dorëzimin e 37 automjeteve të blinduara e rezistente ndaj pritave të minuara, të cilat do të forcojnë mbrojtjen e brendshme të Shqipërisë dhe do të sigurojnë fuqi vendimtare luftimi për NATO-n tha se ky është një tjetër shembull se si “Shqipëria po rritet si një udhëheqëse rajonale në Ballkan”.
Mjetet e blinduara të markës International MaxxPro MRAP, Mine Resistant Ambush Protected, do të përdoren nga strukturat e Forcave tona të Armatosura, që janë dhe pjesë e mbrojtjes kolektive të NATO-s.
Me këtë rast, E ngarkuara me punë e SHBA në Shqipëri, Leyla Moses-Ones e cilësoi dhurimin e mjeteve të blinduara si ndihmë jo vetëm për vendin tonë, por edhe për Aleancën.
“Sot festojmë dorëzimin e 37 automjeteve të mbrojtura e rezistente ndaj pritave dhe kurtheve të minuara ose MRAP për Forcat e Armatosura Shqiptare. Këto automjete, përveç makinave Humvee të blinduara, dhuruar më parë, do ta ndihmojnë Shqipërinë të arrijë një nga objektivat e saj kryesorë të aftësive të NATO-s; grumbullimi i suksesshëm i një Grupi Luftimi Këmbësorie të Motorizuar,” tha kryediplomatja amerikane duke shtuar se kjo aftësi e re e blinduar do të rrisë mbrojtjen e brendshme të Shqipërisë, dhe jo vetëm:
“Do të forcojë krahun jugor të NATO-s dhe do të sigurojë fuqi vendimtare luftarake në NATO që mund të dislokohet në mbështetje të operacioneve globale. Ky është një tjetër shembull se si Shqipëria po rritet si një lider rajonal në Ballkan. Nën drejtimin e shkëlqyer të ministres Xhaçka dhe gjeneral Kollçakut, komunikimi dhe bashkëpunimi midis forcave tona ushtarake nuk ka qenë kurrë më i fortë ndërsa shpërndarja e këtyre automjeteve shënon përfundimin e një faze të bashkëpunimit tonë.”
Ndryshe, në ceremoninë e dorëzimit të këtyre mjeteve, mori pjesë ministrja e Mbrojtjes Olta Xhaçka, e ngarkuara me punë e Shteteve të Bashkuara në vendin tonë, Leyla Moses-Ones dhe Shefi i Shtabit të Përgjithshëm të FA, gjeneral brigade Bardhyl Kollçaku.
