SHBA përshëndet kthimin e kosovarëve nga Siria

Ambasada e Shteteve të Bashkura në Prishtinë ka përshëndetur kthimin e qytetarëve të Kosovës nga zonat e konfliktit në Siri, duke konsideruar se Kosova me këtë hap ka treguar shembull të rëndësishëm në botë, raporton RFE.

“Përmes këtij riatdhesimi, Kosova ka treguar shembull që duhet ndjekur, për të gjithë komunitetin ndërkombëtar dhe anëtarët e Koalicionit Global për mposhtjen e grupit militant, Shteti Islamik (IS),” thekson Ambasada duke shtuar:

“Shtetet e Bashkuara vazhdojnë të jenë mirënjohëse për mbështetjen e Forcave Demokratike Sirine në procesin e kthimit dhe ndalimit të qindra luftëtarëve të IS-is nga dhjetëra shtete”.

Ndryshe, Drejtori i Policisë së Kosovës, Rashit Qalaj, sot ka bërë të ditur se
nga zona e konfliktit në Siri janë kthyer 110 shtetas kosovarë, katër prej të cilëve luftëtarë:

“Nga zona e konfliktit në Siri janë kthyer në Kosovë 110 shtetas kosovarë, prej tyre katër luftëtarë, 32 gra dhe 74 fëmijë, përfshirë këtu katër fëmijë që kanë humbur prindërit në luftë”, tha Qalaj duke saktësuar se në zonën e konfliktit ende mbesin rreth 30 luftëtarë, 49 gra dhe 8 fëmijë.

Të kthyerit nga Siria, sot në mëngjes janë dërguar në qendrën për azil në në fshatin Vranidoll i cili gjendet në periferi të Prishtinës.