SHBA rrëzon një avion pa pilot iranian

Presidenti i Shteteve të Bashkuara, Donald Trump, ka bërë të ditur se forcat detare amerikane kanë qëlluar një avion pa pilot iranian, në ngushticën e Hormuzit, raporton RFE.

“Anija mori masa mbrojtëse kundër një avioni iranian që ishte në një distancë shumë të afërt, afërsisht 900 metra, duke injoruar thirrjet e shumëfishta, dhe duke kërcënuar sigurinë e anijes dhe të ekuipazhit të anijes”, tha Presidenti Trump.

Presidenti i SHBA-së e quajti incidentin, si provokimin e fundit nga ana e Iranit, kundër anijeve që lundrojnë në ujërat ndërkombëtare.

“Shtetet e Bashkuara rezervojnë të drejtën për të mbrojtur personelin, objektet dhe interesat tona”, tha Trump.

Irani tha se nuk kishte informata për humbjen e një avioni.

Zv/ministri i Jashtëm i Iranit, Abbas Araghchi, tha se Teherani “nuk ka humbur asnjë avion në ngushticën e Hormuzit dhe në asnjë vend tjetër”.

Në qershor, Irani rrëzoi një avion pa pilot amerikan në këtë zonë.

Tensionet në rajonin e Gjirit vazhdojnë të jenë të larta.

Të enjten, Teherani tha se kishte konfiskuar një “cisternë të huaj” dhe ekuipazhin e saj për shkak të “kontrabandës me naftë” në Gjirin Persik.

Shtetet e Bashkuara i bën thirrje Teheranit për lirimin e menjëhershëm të cisternës