SHBA sanksionon serbët në Kosovë, Yuri Kim: Tani është koha e duhur…

Pas sanksioneve të vendosura nga Departamenti i Thesarit ndaj grupit kriminal serb që vepron në Veri të Kosovës, ka reaguar Ambasadorja e SHBA në Tiranë, Yuri Kim, thekson se tani është koha e duhur për t’u ndalur dhe për të marrë parasysh pasojat të gjithë ata që janë të përfshirë në korrupsion apo përpjekje për të minuar demokracinë.

“Përpara Ditës Kundër Korrupsionit dhe Samitit për Demokraci, Thesari i SHBA OFAC lëshoi emërtimet e reja. Pas urdhrit ekzekutiv të Presidentit Biden, qeveria amerikane do të intensifikojë hapat për të mbajtur përgjegjës ata që janë të përfshirë në korrupsion ose minimin e demokracisë,” thekson Ambasadorja Yuri Kim në reagimin e saj përmes rrjetit social Twitter pas publikimit të sanksioneve nga Departamenti i Thesarit duke paralajmëruar:

“Përcaktimet publike të tilla ndonjëherë duan vite për t’u realizuar, por kur ndodhin janë shkatërruese. Nëse jeni të përfshirë në korrupsion apo përpjekje për të minuar demokracinë, tani është koha e duhur për t’u ndalur dhe për të marrë parasysh pasojat.”

Ndryshe, sot përmes një Komunikate, Departamenti i Thesarit të SHBA ka bërë të ditur se Millan Radoiçiç, Zvonko dhe Zharko Veselinoviç, Srgjan Vulloviç, Zhelko dhe Andrija Bojiç dhe Radulle Steviç, të gjithë serbë nga Kosova, janë vënë në Listën e sanksioneve.