SHBA, vazhdon mbështetja për Policinë e Kosovës

Sot, në ambientet e Drejtorisë së Përgjithshme të Policisë së Kosovës, Drejtori i Përgjithshëm i Policisë së Kosovës, Rashit Qalaj, ka pritur në takim zyrtar Ambasadorin amerikan, Philip S. Kosnett, i cili ishte i shoqëruar nga zyrtarë të ICITAP-it amerikan.

Drejtori Qalaj duke falënderuar Ambasadorit amerikan Kosnett për vizitën dhe përkrahjen e vazhdueshme që SHBA ka bërë dhe po vazhdon ti bëjë Policisë së Kosovës, e informoi se Policia e Kosovës mbetet e përkushtuar në realizimin e detyrave dhe obligimeve të saja ligjore karshi qytetarëve pa dallime, në të mirë të sigurisë dhe rendit në Republikën e Kosovës.

Temë diskutimi e këtij takimi ishin siguria e përgjithshme në Kosovë, lufta kundër të gjitha llojeve të krimit, ngritja dhe forcimi i integritetit dhe kapaciteteve policore, vazhdimi i bashkëpunimit me të gjitha institucionet relevante vendore dhe ndërkombëtare, si dhe synimi drejt anëtarësimit të PK-së në organizata ndërkombëtare.

Ambasadori Kosnett vlerësoi përpjekjet dhe kontributet e Policisë së Kosovës për sigurinë e të gjithë qytetarëve, dhe ishte i inkurajuar nga politikat e Policisë së Kosovës që kanë të bëjnë me përfshirjen dhe trajtimin e barabartë të të gjitha etniciteteve. Me këtë rast Ambasadori Kosnett konfirmoimbështetjen e vazhdueshme të Ambasadës së SHBA ndaj Policisë së Kosovës, veçanërisht në lidhje me fuqizimin e sundimit të ligjit në Kosovë.