SHBA vendosin doganë për mallërat evropiane

Shtetet e Bashkuara kanë vendosur doganë shtesë në vlerë prej 7.5 miliardë dollarë për disa prodhime evropiane, që është dhe një ofensivë e re e Presidentit Donald Trump përkundër kërcënimeve nga BE, që do të vendosin masa reciproke, raporton Agjencia e lajmeve AFP.

Duke filluar prej sot, një minutë pas mesnate, doganat janë në fuqi ndër të tjera për avionët Airbus, verën franceze dhe scotch whisky.

 Qeveria amerikane ka marrë dritën jeshile nga Organizata Botërore e Tregtisë që të vendos doganë si përgjigje në subvencionet që BE i jep kompanisë Airbus.

Ndryshe, Presidenti Trump të mërkurën ka akuzuar vendet evropiane për barriera të shumta kundër importit nga Shtetet e Bashkuara por nuk ka përjashtuar mundësinë për një marrëveshje, në mënyrë që ky kontest të marrë fund.

Ministri i Financave i Francës, Bruno Le Maire, i cili po qëndron në Washington në takimin vjetor të FMN, i ka tërhequr vërejtjen qeverisë amerikane, se vendimi mbi doganat do të ketë pasoja si ekonomike ashtu dhe politike.

“BE është e gatshme të përgjigjet,” tha Le Maire.

Ndërkohë për sot është parashikuar një takim në mes të Përfaqësuesit tregtar amerikan, Robert E. Lighthizer dhe Le Maire.