SHBA zhvendosin trupat brenda Europës

Para disa muajsh presidenti i SHBA deklaroi zhvendosjen e trupave brenda Europës por tani marrëveshja është e plotë, dhe Presidenti Trump dhe homologu i tij polak Duda e nënshkruan këtë Marrëveshje.

Sipas marrëveshjes trupat e SHBA do të përforcohen në Poloni me rreth 1000 ushtarë e më pas deri në 5500 forca. Presidenti Donald Trump dhe presidenti i Polonisë Andrzej Duda nënshkruan marrëveshjen në New York, ku po marrin pjesë në Asamblenë e Përgjithshme të OKB-së, raporton DW. Një marrëveshje parimore për këtë të dy krerët e shteteve e kanë vendosur në qershor gjatë vizitës së Duda në Shtëpinë e Bardhë në Washington. Fillimisht marrëveshja duhej nënshkruar në fillim të muajit në kuadër të vizitës së Trump-it në Varshavë. Por Presidenti Trump e anuloi këtë udhëtim për shkak të uraganit në SHBA.

Polonia mbulon kostot

Presidenti Trump tha në New York, se Polonia ka marrë përsipër të financojë infrastrukturën e nevojshme për ushtarët shtesë. Trupa shtesë do të dislokohen në Poloni duke u zhvendosur nga vendet e tjera të Europës. Presidenti Trump ka përmendur në këtë kontekst edhe tërheqjen e trupave të SHBA-së nga Gjermania.

Në marrëveshjen mes Polonisë dhe SHBA-së janë përcaktuar edhe vendet e përforcimit të trupave amerikane, sikurse mësohet nga një deklaratë e përbashkët e publikuar në Poloni. Kuartieri qendror i divizionit do të jetë në qytetin Poznan. Në deklaratë thuhet, se të dyja palët duan të vazhdojnë bisedimet lidhur me një vend të mundshëm për dislokimin e brigadës së tankeve të SHBA-së.

Varshava prej kohësh përpiqet për përforcimin e trupave amerikane. Shumë polakë e shohin SHBA-në si fuqi mbrojtëse kundrejt Rusisë, e cila për shkak të krizës në Ukrainë konsiderohet si rrezik në vendet e krahut lindor të NATO-s.