Shefi i inteligjencës: Spitalet gjermane janë në rrezik nga hakerët

Spitalet gjermane kanë rrezik të shtuar që të jenë në shënjestër të sulmeve kibernetike, tha sot kreu i Agjencisë së Inteligjencës Gjermane, pasi gjatë këtij muaji shërbimi i shëndetësisë së Irlandës dhe një gazsjellës amerikan, ishin në shënjestër të hakerëve.

Të premten, shërbimi i shëndetësisë së Irlandës mbylli sistemet IT, për t’u mbrojtur nga sulmet kibernetike, duke shkaktuar shumë telashe në sistemin e shëndetësisë, veçmas për testimet për COVID-19.

Në pesë vitet e fundit, klinikat në Gjermani kanë qenë në shënjestër të një serie të sulmeve dhe Arne Schoenbohm, shef i agjencisë së sigurisë kibernetike, i tha gazetës Zeit Online se sheh “një rrezik më të madh për spitalet”.

Në fillim të majit, raporton RFE, Coloinial Co, kompani e gazsjellësit në SHBA, ndërpreu të gjitha shërbimet, pas një sulmi të madh kibernetik.

Schoenbohm tha se shumë biznese gjermane janë në rrezik të shtuar që të jenë në shënjestër të hakerëve, pasi gjermanët, për shkak të pandemisë, kryesisht po punojnë nga shtëpitë.

“Shumë kompani kanë lejuar që të punohet nga shtëpia”, tha ai, duke shtuar se kjo gjë mund të bëjë që sistemet e tyre të IT-së të jenë më të ndjeshme për të qenë cak i ndonjë sulmi eventual kibernetik.