Shefi i NATO-s, Stoltenberg, planifikon të largohet nga detyra në tetor

Lideri afatgjatë i NATO-s, Jens Stoltenberg, nuk ka plan ta zgjasë mandatin e tij për herë të katërt dhe pret të zëvendësohet në tetor të këtij viti, tha Aleanca ushtarake.

“Mandati i Sekretarit të Përgjithshëm, Jens Stoltenberg, është zgjatur tri herë dhe ai ka shërbyer prej pothuajse nëntë vjetësh”, tha zëdhënësja Oana Lungescu.

Ish-kryeministri norvegjez 63-vjeçar, raporton RFE, mori detyrën në selinë e NATO-s në Bruksel më 1 tetor 2014 dhe ka mbikëqyrur aleancën perëndimore në disa kriza ndërkombëtare.

Gjatë mandatit të tij në detyrë, personeli i fundit i NATO-s dhe forcat amerikane u larguan nga Afganistani në gusht të vitit 2021, pak para se kryeqyteti Kabul të binte në duart e talibanëve, të cilët ringjallën regjimin e tyre islamik.

Stoltenberg ka mbikëqyrur, gjithashtu, përgjigjen e NATO-s ndaj pushtimit rus të Ukrainës në shkurt të vitit 2022 dhe luftës në vazhdim.

Ai ka qenë një sekretar i përgjithshëm i respektuar dhe në veçanti një urë lidhëse midis aleatëve evropianë dhe Uashingtonit nën ish-presidentin amerikan, Donald Trump, një kritik i shpeshtë i NATO-s.

Diplomatët nga disa aleatë të NATO-s, raporton RFE, kishin spekuluar se mandati i Stoltenbergut mund të zgjatet edhe një herë deri në një samit vitin e ardhshëm për të shënuar 75 -vjetorin e aleancës.

Por, pas një vizite në Washington javën e kaluar, zyra e tij njoftoi se ai nuk do të kërkonte një zgjatje tjetër të mandatit.