Shefi i OKB për të drejtat e njeriut: Situata në Bregun Perëndimor, përkeqësim dramatik!

Palestinezët në Bregun Perëndimor po përballen me përkeqësimin dramatik të situatës në aspektin e të drejtave të njeriut përveç “vdekjes jomorale dhe vuajtjes” në Rripin e Gazës, tha shefi i Kombeve të Bashkuara për të drejtat e njeriut, Volker Türk.

“Situata në Bregun Perëndimor, duke përfshirë dhe Jerusalemin Lindor, po përkeqësohet në mënyrë dramatike,” tha Volker Türk në mbledhjen e Këshillit të OKB për të drejtat e njeriut.

Bregu Perëndimor nën okupimin izraelit, ku administrata palestineze e njohur ndërkombëtarisht ka pushtetin e kufizuar, po përballet me trazirat më të këqija në disa dekada të fundit paralelisht me luftën në Rripin e Gazës, që drejtohet nga Hamasi.

Volker Türk tha se nga fillimi i luftës në Gazë në muajin tetor deri nga mesi i qershorit, forcat izraelite të sigurisë kanë vrarë 528 palestinezë në Bregun Perëndimor, duke përfshirë 133 fëmijë, dhe në disa raste “ekziston shqetësimi serioz për vrasjet e paligjshme”.

Ai tha se në Bregun Perëndimor dhe në Izrael janë vrarë 23 izraelitë në konfliktin me palestinezët ose gjatë sulmeve të tyre, tha ai.

Sa i përket Gazës, Volker Türk tha se “është tmerruar me shkeljen e të drejtave ndërkombëtare të njeriut dhe të drejtës humanitare” të të gjitha palëve në konflikt. “Sulmet e pamëshirshme izraelite në Gazë shkaktojnë vuajtje të mëdha dhe shkatërrim, ndërsa pamundësimi arbitrar i dërgimit të ndihmave huamnitare ka vazhduar,” tha Türk.

“Izraeli vazhdon të arrestoj në mënyrë arbitrare qindra palestinezë. Kjo nuk mund të vazhdoj më,” tha ai duke shtuar se grupet e armatosura palestineze vazhdojnë të mbajnë pengjet, gjithashtu në zona të banuara, që kërcënon pengjet dhe civilët.

Misioni i përhershëm i Izraelit pranë OKB në Gjenevë ka akuzuar Volker Türkun se “plotësisht po shmang barbarinë e terrorizmit” në raportimin e tij para Këshillit të Kombeve të Bashkuara për të drejtat e njeriut.