Shell drejt shpimit të pusit vlerësues Shpirag 5 në Bllokun 2-3

Kompania Shell parashikon që të vijojë punën e saj për shpimin e pusit vlerësues Shpirag 5 dhe në vazhdën e kësaj ka paraqitur një përmbledhje joteknike të Vlerësimit të Ndikimit në Mjedis pikërisht për këtë projekt.

Ky dokument do të konsultohet më palët e interesit ndërkohë që bëhet e ditur se përveç lokacionit të parë të vendosur për shpimin e pusit vlerësues Shell ka përfshirë edhe dy lokacione të tjera alternative. Shpimet për Shpirag 5 parashikohet që në nisin në tremujorin e parë të vitit 2022. Ndërkohë që nëse do të ketë shpime të reja do të varet nga rezultatet që do të kenë puset Shpirag 3, 4 dhe 5.

“Shell Upstream Albania B.V. (këtu e më poshtë referuar Shell) është operatori i Kontratës me Ndarje Prodhimi (KNP) të Blloqeve 2-3 në tokë, në Shqipëri. Shell planifikon të kryejë brenda Blloqeve 2-3 shpimin e pusit vlerësues Shpirag-5, në një zonë në afërsi të fshatit Konisbaltë, i cili gjendet në territorin e Bashkisë Ura Vajgurore. Sheshi i pusit të propozuar Shpirag-5 i cili zë rreth 43,839.8 m2 gjendet afër sheshit ekzistues të puseve Shpirag-2/4 të SUA-s dhe kampit të punëtorëve”, thuhet në dokument.

I njëjti vlerëson se Shpirag-5 është një pus vlerësues i cili shërben për të vlerësuar nëse ka rezerva të mjaftueshme që të garantojnë një zbulim fitimprurës. Sipas Shell pusi vlerësues do të ketë si objektiv një strukturë nëntokësore shumë të thellë të quajtur “Shpiragu”; kjo është një strukturë që pritet të përmbajë naftë ose gaz. “Qëllimi i projektit është të ndihmojë të përcaktohet nëse ky rezervuar përmban hidrokarbure (naftë e lehtë, kondensat dhe gaz natyror) ekonomikisht të shfrytëzueshme”, thuhet në dokument.

Pusi vlerësues pritet të bëjë një vlerësim të rezervuarit të hidrokarbureve që pritet të gjendet ndërmjet 4,000 – 7,000 metra thellë në tokë. Ky nuk është pusi i vetëm që Shell ka. Aktivitetet kërkimore kanë nisur në vitin 2010. Gjatë periudhës 2012-2018 u shpuan puset kërkimorë e vlerësues Shpirag-2, Molisht-1 dhe Shpirag-3. Aktualisht vazhdon shpimi i pusit vlerësues Shpirag-4.

Blloku 2-3 kohë më parë është ndarë mes dy kompanive Shell dhe Petomanas por kjo e fundit u largua nga Shqipëria në vitin 2016 dhe Shell u bë zotëruesja e vetme e këtij Blloku./Monitor/