Shembet Ish-Hotel “Adriatiku”, nën rrënoja një 27 vjeçar

Gjatë punimeve në Ish-Hotelin “Adriatiku” në Mitrovicë, është shembur një pjesë e tij, me ç’rast nën rrënoja ka mbetur një 27 vjeçar.

Mësohet se pas instruksioneve të arkitetit të punimeve që të rrëzohet njëra nga kolonat e hotelit, rreth ores 17:00 është shembur një pjesë e objektit dhe nën rrënoja ka mbetur punëtori me inicialet V.B.(dt.1992).

Në vendin e ngjarjes kanë shkuar policia, ambulanca, zjarrfikësit, ekspertët e Emergjencave dhe kanë nisur punën e kërkim-shpëtimit por punimet me fadromë për pastrimin e rrënojave në vendin e shembjes së Ish-Hotel “Adriatiku” rezultuan pa sukses; Dhe, për shkak të rrezikut të shembjes së matutjeshme të objektit, KosovaPress raporton se ekipet e shpëtimit kanë vazhduar punën me dorë për largimin e rrënojave.

Ndryshe, katër punëtorë kanë qenë duke punuar në Ish-Hotelin “Adriatiku” në momentin e shembjes, ku tre prej tyre kanë arritur të dalin, derisa një ka mbetur nën rrënoja.

Hetimi rreth shkaqeve të këtij aksidenti të rëndë vazhdojnë.