“Shën Tereza në Treviso”, Limaj: Ky përurim simbolik tregon shpirtin e madh të një kombi të vogël, i cili ka nxjerrë një bijë kaq të madhe

Zëvendëskryeministri i Kosovës, Fatmir Limaj ka marrë pjesë në përurimin e monumentit të Shën Nënë Terezës, në Treviso të Italisë.

Duke vlerësuar lartë figurën e Shën Terezës Limaj tha se përurimi simbolik i Shën Terezës tregon edhe njëherë zemrën e madhe dhe shpirtin e madh të një kombi të vogël i cili ka nxjerrë një bijë kaq të madhe, e cila, siç tha Limaj, i ka shërbyer gjithë njerëzit me shembullin dhe kontributin e saj.

“I ka shërbyer njerëzve në nevoje me dashuri për ata që kanë pasur nevoje dhe ka qenë afër tyre që kanë pasur nevoje. Këtë përmendore e bën edhe me madhështore që jemi në vitin e Skënderbeut heroit tonë kombëtar, i cili i jep kuptim qenies tonë kombëtare dhe është identiteti ynë kombëtar”, tha Limaj duke shtuar se të gjithë ata që kanë bërë të mundur ngritjen e kësaj përmendore e kanë nderuar jo vetëm figurën e shenjtë të saj, por edhe kombin shqiptar në përgjithësi.

Fatmir Limaj ka falënderuar edhe autoritetet italiane të cilat kanë bërë të mundur që mërgimtarët tanë në Itali të jenë të organizuar dhe të kenë kushte për të kultivuar traditën e tyre.

Në emër të Qeverisë së Republikës së Kosovës, Zëvendëskryeministri Limaj i ka falënderuar iniciuesit e këtij projekti. Pjesë e këtij manifestimi ishin edhe zëvendësministrat Anton Berisha, Gjergj Dedaj e Afrim Bekteshi.