Shëndetësia online, Edi Rama: 41 shërbime përmes e-albania!

Karta e shëndetit, përgjigjet e analizave por edhe vendosja e orarit për vizitën me mjekun do të realizohen përmes portalit e-Albania, u tha me rastin e inspektimit të përfundimit të rikonstruksionit të Qendrës Shëndetësore në Vorë nga ana e Kryeministrit Edi Rama ku tha se janë 41 shërbime në shëndetësi që do të ofrohen online.

“Kam qenë më parpara këtu dhe ka qenë katastrofë. Në Vorë mrekullia vet do të jetë rindërtimi, pasi ka shumë godina për t’u shembur. Do bëjmë një gjë shumë të bukur në Vorë. Pra kjo është karta e shëndetit, me vulën elektronike, me të cilën keni bërë 60 mijë udhëtime. Ta harrojnë tani. Nuk ka nevojë më për këtë. Mjafton që ju të vini tek mjeku dhe ai e bën vet këtë punë. S’kam kartë, nxirre kartën, ku e ke, shko merre. Na doli, s’na doli, këto s’vlejnë më,” tha Edi Rama duke i dhënë një qytetari një kartë:

“Mbaje këtë, ta kesh si kujtim nga Edi Rama. Pra radha në qendra shëndetësore, ishte më shumë për rinovimin e kartave!

Kryeministri Edi Rama teksa shoqërohej nga ministrja e Shëndetësisë Ogerta Manastirliu, premtoi se pavarësisht dixhitalizimit të shërbimeve, duke hequr kështu sportelet dhe duke shmangur radhët e qytetarëve, askujt nuk i cënohet vendi i punës.

“Ata nuk do të ikin nga puna. Ata tani do të bëjmë më shumë punë. Recepsionistët dhe sportelistët nuk do të pushohen nga puna. Ju do të jeni këtu për ndihmuar këtë sistem online,” tha Edi Rama.

Ndryshe, duke filluar nga 1 janari , 41 shërbime të shëndetësisë dhe mbrojtjes sociale do ofrohen online. Një risi tjetër në këtë paketëështë ripërcaktimi i vizitës ose ekzaminimit. Dhe, të gjitha rezultatet e kontrollit mjekësor bazë shihen online nëpërmjet portalit e-albania. Për të pasur akses në këtë rrjet çdo individ do të duhet të  regjistrohet duke përdorur kartën e identitetit.