Shëngjin, anija me 12 emigrantë niset drejt Italisë

Anija me 12 emigrantët që prej 3 ditësh ishin akomoduar në kampin e Gjadrit, u nis drejt Italisë.

Mëngjesin e sotëm, një anije e rojës bregdetare italiane mbërriti në portin e Shëngjinit, ndërsa një autobus nën masa të forta sigurie, bëri transportin e grupit prej 12 emigrantësh nga Gjadri drejt portit.

I gjithë procesi ka zgjatur vetëm pak minuta, ndërsa pas procedurave formale, grupi prej 12 emigrantësh ka hipur në anije për tu rikthyer në Itali.

Mësohet se anija me 12 emigrantë do të ndalet në Portin e Barit dhe më pas emigrantët do të akomodohen në një qendër pritjeje, ku do të kenë një afat 14 ditor për të apeluar vendimin që refuzon azilin e tyre.

Anija e patrullimit e Rojës Bregdetare, u nis nga Brindisi, u ankorua në Shëngjin, nga ku bashkë me 12 emigrantët që ishin akomoduar në kampin e Gjadrit, do të ndalet në portin e Barit, raportojnë mediat italiane.

Ndryshe, dje Seksioni i migracionit i Gjykatës së Romës e konsideroi të pavlefshme mbajtjen në kampin e Gjadrit të 10 shtetasve nga Bangladeshi dhe 6 të tjerëve nga Egjipti, dy vende të konsideruara jo të sigurta, nga një vendim i Gjykatës së Drejtësisë evropiane dy javë më parë. Katër prej tyre u kthyen pas, dy për shkak të problemeve shëndetësore dhe dy të tjerë pasi u deklaruan të ishin të mitur.