Shënohet 36 vjetori i grevës së minatorëve të “Trepçës”

Manifestimi qendror “Java e Minatorëve” ka filluar sot në Stan Tërg në 36 vjetorin e grevës historike të minatorëve të “Trepçës”, e cila lëkundi themelet e shtetit të atëhershëm të Jugosllavisë.

Kryeministri Albin Kurti  tha se “Trepça” ka qenë edhe subjekt shoqëror në historinë e Kosovës, me efekte rajonale e jehonë ndërkombëtare.

“Kërkesat e minatorëve ishin të shtruara në 10 pika, ku pika 8 thoshte: Fati i shqiptarëve të shqyrtohet në Kombet e Bashkuara. Pra qysh në atë grevë kërkohej ndërkombëtarizimi i çështjes,” tha Albin Kurti.

Sipas tij, e ardhmja e “Trepçës” është në duart e atyre që e ndërtojnë përditë.

Ndërsa, ministrja e Ekonomisë, Artane Rizvanolli tha se i presin punë të mëdha tutje.

“Viti 2025 për ‘Trepçën’ do të jetë vit i reformave, që ta bëjmë ‘Trepçën’ ndërmarrje të qëndrueshme,” tha Artane Rizvanolli.

Ndërkohë Kryeshefi ekzekutiv i ndërmarrjes “Trepça”, Faton Ahmeti tha se greva e minatorëve para 36 viteve nuk ishte vetëm një akt sindikal, por, një mesazh i fuqishëm.

Ndërsa Kryetari i Sindikatës, Ibrahim Januzi kërkoi kushte më të mira të punës në minierë.

“E kam obligim moral të shpreh problemet që na kanë katandisur ne si minatorë. Jemi katandisur në një gjendje aq të rëndë. Mungesa e pajisjeve sot rrezikon jetët tona. ‘Trepça’ sot është lënë në mëshirë të fatit,” tha Ibrahim Januzi.